Студэнты і выкладчыкі ўнівэрсытэту Бэнінгтана ў штаце Вэрмонт правялі акцыю салідарнасьці з Мартай Шчарбаковай.
Беларуская навучэнка гэтай установы за апошнія дні была двойчы затрыманая на пратэстных акцыях у Менску і асуджаная на 8 сутак адміністрацыйнага арышту за ўдзел у «несанкцыянаваным мерапрыемстве». З турмы на Акрэсьціна яе перавезьлі ў Жодзіна.
Цяпер у Бэнінгтане займаецца яе аднакурсьніца зь Менска Ульяна Шкель. Зь яе ініцыятывы студэнты вырабілі плякаты ў падтрымку Марты Шчарбаковай у колерах гістарычнай беларускай сымболікі. А на тэрасе галоўнага корпусу залунаў вялікі бел-чырвона-белы сьцяг.
У сваёй прамове прэзыдэнтка ўнівэрсытэту Лора Ўокер выказала падтрымку зьняволенай студэнтцы, абурыўшыся гвалтам з боку сілавых структураў.
Кіраўніца супольнасьці інтэрнацыянальных навучэнцаў Ара Аман падкрэсьліла, што Марта магла працягваць займацца, але сьвядома вярнулася ў Беларусь, каб змагацца за перамены. Гэтая ахвярнасьць уразіла і прымусіла больш пільна зьвярнуць увагу на сытуацыю ў Беларусі.
Адміністрацыя запэўніла, што будзе максымальна спрыяць сваёй беларускай студэнтцы і зь нецярпеньнем чакае яе вызваленьня і вяртаньня ва ўнівэрсытэцкія аўдыторыі. А студэнты прысьвяцілі сяброўцы «шалёны танец салідарнасьці».
Марта Шчарбакова — выпускніца Беларускага гуманітарнага ліцэя. Пасьля яго заканчэньня два гады вучылася ў Аб’яднаным сусьветным каледжы Паўднёва-Усходняй Азіі ў Сынгапуры. Паступіла ў унівэрсытэт Бэнінгтана, які спэцыялізуецца на мастацкіх дысцыплінах, але перад ад’ездам у ЗША ўзяла gap year і цягам году валянтэрыла ў Сэнегале.
Калі яшчэ перад прэзыдэнцкімі выбарамі на радзіме пачаліся жорсткія затрыманьні ўдзельнікаў мірных акцый, тэрмінова адляцела з Бэнінгтану ў Менск.
Першы раз яе затрымалі 6 верасьня разам з мамай Вікторыяй і сястрой Янай падчас нападу на калёну «Маршу адзінства» у раёне вуліцы Чабатарова. Восем гадзін Шчарбаковы правялі ў Заводзкім РУУС.
Другое затрыманьне ператварылася для Марты ў 8 сутак арышту.
