Лінкі ўнівэрсальнага доступу

Прэм’ер Чэхіі апраўдваецца за вэта на сустрэчу зь Ціханоўскай


Андрэй Бабіш

Перад сваім адлётам у Польшчу для ўдзелу ў саміце Вышаградзкай чацьвёркі прэмʼер-міністар Чэхіі Андрэй Бабіш заявіў, што хоча ўнесьці сытуацыю ў Беларусі ў парадак дня Эўрапейскай рады.

«Я адкідаю абвінавачаньні, што нібыта наклаў вэта на сустрэчу зь беларускай апазыцыяй. Я сказаў, што гэта не было добрай ідэяй і што прэмʼер-міністры Вугоршчыны і Славаччыны прытрымліваюцца той жа думкі. Беларусь абвінавачвае нас у кібэрвайне, і сустрэча была б на руку Лукашэнку», – патлумачыў Бабіш.

«Мы хочам займацца гэтым на агульнаэўрапейскай аснове. Польскі бок выступіў з прапановай [запрашэньня Ціханоўскай на саміт. – РС] у апошнюю хвіліну, і мы былі вельмі зьдзіўленыя. Мы зьбіраемся на саміт, найперш каб уключыць гэты пункт у парадак дня Эўрапейскай рады, таму што цяпер яго там няма», – сказаў Бабіш.

Эўрапейская рада – найвышэйшы палітычны орган Эўразьвязу, які складаецца з кіраўнікоў дзяржаваў і ўрадаў краінаў Эўразьвязу.

Напярэдадні праз пазыцыю прэм’ер-міністра Чэхіі Андрэя Бабіша была адкінутая прапанова Польшчы запрасіць Сьвятлану Ціханоўскую на пятнічны саміт кіраўнікоў дзяржаў Цэнтральнай Эўропы. Бабіш заявіў, што такі крок будзе «пасьпешлівым», пакуль ня выпрацавалі агульнаэўрапейскую пазыцыю.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG