Лінкі ўнівэрсальнага доступу

Беларуска прайшла па канаце над Ціхім акіянам зь бел-чырвона-белым сьцягам


Каб падтрымаць беларусаў, Катажына прайшла па канаце, нацягнутым на вышыні 34 мэтры над паверхняй Ціхага акіяну. Гэта адбылося ў Аўстраліі.

«Я спадзяюся, што камусьці ў Беларусі ад гэтага хаця б на хвілінку стане сьвятлей, — тлумачыць Катажына свой учынак. — Сьцяг пашылі ўсёй беларускай дыяспарай. Як толькі спыталіся, адразу дзьве жанчыны прапанавалі дапамогу, запрасілі дахаты».

Захоплівае дух! Беларуска прайшла па канаце над Ціхім акіянам
пачакайце

No media source currently available

0:00 0:00:58 0:00

Катажына фізык. «Мадэлюю плязму ўнутры порыстых матэрыялаў, у асноўным для мэдычнага ўжываньня», — кажа яна пра сваю працу.

Яна зь Менску, у Аўстраліі вучылася, атрымала стыпэндыю і засталася ў дактарантуры.

«„Хайлайнінг“ — гэта хобі» — кажа яна. — Адна з разнавіднасьцяў «слаклайнінгу» — хаджэньня па тросе на вышыні, але над паверхняй зямлі альбо вады.

«Пра Беларусь думаю заўжды, — кажа дзяўчына. — Кладуся спаць па менскім часе, а ў Аўстраліі гэта ўжо ранак. Думаю — як дапамагчы, што зрабіць, абы толькі яны не здаліся. І пра тое, якія ж беларусы малайцы!»

Яна кажа, што ў Аўстраліі цяжка патлумачыць, што адбываецца ў Беларусі.

«Аўстралійцы вельмі добразычлівы народ, ім цяжка ўявіць маштаб гвалту, беззаконьня, — тлумачыць яна. — Я паказваю ня самае жорсткае, напрыклад, як сілавік зьбівае люстэрка ў аўтамабіля. Глыбіню ўсяго гэтага проста не асэнсаваць. Тут чулі пра падзеі ў Беларусі і спачуваюць».

Катажына кажа, што яе сяброў затрымлівалі ў Беларусі, бо яны былі назіральнікамі на выбарах.

«Сябар кажа: „Мне вельмі пашанцавала“, — згадвае яна. — Аказваецца, яго зьбілі, гадзінамі трымалі на каленях на вуліцы і два дні не кармілі. І мы абое разумеем, што яму сапраўды пашанцавала».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG