Лінкі ўнівэрсальнага доступу

«Галоўнае — выцягнуць яго адтуль». Інвалід шукае дапамогі арыштаванаму пасьля пратэстаў брату-блізьнюку


Ілюстрацыйнае фота. Затрыманьні падчас пратэстаў у Менску

Студэнта БДУІР Мікалая Сасева ўжо больш як тры тыдні трымаюць у розных вязьніцах Менску: спачатку ў СІЗА КДБ, цяпер у менскім ізалятары на вуліцы Валадарскага. Пра гэта Свабодзе паведаміў ягоны брат Рыгор Сасеў, якому праблемы са здароўем перашкаджаюць дапамагаць брату як мае быць.

«Мы з братам двайняты, розныя зьнешне, але думаем падобна. Я за яго вельмі перажываю», — кажа Рыгор Сасеў.

Паводле Рыгора, ягонага брата трымаюць як падазронага ў арганізацыі масавых беспарадкаў, хоць абвінавачаньня яшчэ ня выставілі.

«Брат не вярнуўся дамоў 13 жніўня, ён быў у сьпісах зьніклых, потым знайшоўся ў „амэрыканцы“. А недзе з 17 жніўня ён у СІЗА на Валадарскага. Адтуль напісаў, што яго падазраюць у арганізацыі масавых беспарадкаў, хоць ён у гэтым не вінаваты», — кажа Рыгор Сасеў.

Хлопец не адмаўляе, што ягоны брат хадзіў на дэманстрацыі пратэсту, але ня бачыць у гэтым злачынства.

«Брат нічога не арганізоўваў. Проста ён аказаўся знаёмым чалавека, такі Ярмолаў, якога трымаюць у СІЗА КДБ таксама нібыта як арганізатара пратэстаў. Мікалай вельмі добры чалавек. Мы жывём без бацькоў, нас выхавала бабуля, ёй ужо за 80. Я не працую, фактычна ў нашай сям’і ўсё трымаецца на ім. Галоўнае для нас — выцягнуць яго адтуль», — сказаў Свабодзе Рыгор Сасеў.

Кіраўніка школы танцаў Ігара Ярмолава, зь якім нібыта знаёмы Мікіта Сасеў, затрымалі ва ўласнай кватэры 12 жніўня. У выніку затрыманьня ў яго прабіта лёгкае, паламанае рабро, чэрапна-мазгавая траўма і гематомы на ўсім целе.

12 жніўня маці Ігара Ярмолава Сьвятлана Іванаўна страціла сувязь з сынам, абодва ягоныя тэлефоны зрабіліся недасяжнымі. Ігара ўдалося знайсьці толькі празь дзень дзякуючы адвакатам. Ён значыўся ў сьпісах СІЗА КДБ, але знайшоўся ў вайсковым шпіталі ў цяжкім стане.

Ігар быў валянтэрам штабу Віктара Бабарыкі, пасьля заканчэньня БДУ мог працаваць у ІТ, але вырашыў займацца танцамі. Ён стварыў школу танцаў Dance Cafe.

Мікалаю Сасеву 25 год, ён студэнт-завочнік Беларускага дзяржаўнага ўнівэрсытэту інфарматыкі і радыёэлектронікі. Зь лістоў брата з «Валадаркі» Рыгор зрабіў выснову, што ўмовы ўтрыманьня ў яго дрэнныя.

«Піша, што ў камэры няма чым дыхаць, там шмат кураць, а ён цыгарэтнага дыму не пераносіць», — кажа Рыгор Сасеў.

Паводле яго, лісты ад брата зь СІЗА прыходзяць рэгулярна, да яго даходзяць перадачы.

Свабода пагаварыла зь дзяўчынай Мікалая Сасева, якая пацьвердзіла ўсе зьвесткі пра яго, атрыманыя ад брата Рыгора. У тым ліку суразмоўца пацьвердзіла імя знаёмага, якога таксама падазраюць у арганізацыі масавых беспарадкаў і трымаюць, паводле яе, у СІЗА КДБ.

«Гэта Ігар Ярмолаў, які быў у штабе Віктара Бабарыкі. Ён пасьля затрыманьня трапіў у шпіталь, а цяпер у „амэрыканцы“. Наколькі ведаю, яны проста былі знаёмыя. Ад адваката пра справу Мікалая нам амаль нічога не вядома, спасылаецца, што даў падпіску», — сказала дзяўчына Мікалая Сасева.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG