«Яны ратавалі людзей». Кіраўніцтва Менскай станцыі ратаваньня на вадзе шукае работнікаў, якія перавозілі дэманстрантаў
У Менскай гарадзкой станцыі ратаваньня на водах не камэнтуюць зьвестак пра лёс 6 супрацоўнікаў станцыі, якіх затрымалі 6 жніўня. Яны выцягнулі з вады і перавезьлі на другі бераг некалькі дэманстрантаў, якія ратаваліся ад АМАПу.
«Служыць бы рад…» Як можна працаваць у Адміністрацыі прэзыдэнта пасьля таго, што адбылося на Акрэсьціна
Менскаму музыку Яўгену Кулічкіну яшчэ нядаўна мусілі б зайздросьціць ягоныя аднакурсьнікі з Унівэрсытэту культуры і мастацтваў. Пагадзіцеся, празь некалькі гадоў пасьля дыплёму трапіць не ў музычную школу, ня ў дом культуры аграгарадка, а быць запрошаным у прэзыдэнцкі аркестар — удача, якая рэдка каму ўсьміхаецца. Раскошныя ўмовы для рэпэтыцый, высокапрафэсійныя калегі, разнастайны рэпэртуар, добры заробак, абласканасьць уладай. Але нічога зь пералічаных плюсаў і профітаў не стрымала ўдачлівага музыку. Хоць ён ня граў у тым аркестры першую скрыпку, і на ягоныя партыі ўжо знайшлі выканаўцу, ягоны галоўны канцэрт, упэўнены ён, яшчэ наперадзе.
Мітрапаліт Кандрусевіч зьвярнуўся з-за мяжы: «Пралілася кроў, тысячы людзей зняволеныя, шмат пакалечаных»
Мітрапаліт Тадэвуш Кандрусевіч з-за мяжы зьвярнуўся да сьвятароў і вернікаў.
Пазыцыя Памежнага камітэту адносна Кандрсевіча не памянялася
У Дзяржаўным памежным камітэце Беларусі 7 верасьня а 14 гадзіне Свабодзе паведамілі, што да іх паступіла скарга мітрапаліта Тадэвуша Кандрусевіча на забарону яму прыехаць на радзіму.
«Скарга разглядаецца, ці падрыхтаваны ўжо адказ, на гэты момант сказаць не магу. Паводле закону мы маем на гэта 15 дзён», — сказаў Свабодзе афіцыйны прадстаўнік Памежнага камітэту Антон Бычкоўскі.
Тлумачэньняў, на якой падставе дзейнічае забарона на ўезд грамадзяніну Беларусі ў сваю краіну, там па-ранейшаму няма
«Мяне ўжо вялі ў аўтазак, таму мама зь сястрой паехалі са мной». У Менску затрымалі маці з дочкамі-студэнткамі
Сям’я Шчарбаковых — маці Вікторыя і дзьве дачкі, Яна і Марта, — 8 гадзін правялі ў Заводзкім РУУС пасьля затрыманьня на вуліцы Чабатарова.
У кавярні, дзе сілавікі разьбілі шыбу, прадалі ўжо ня менш за 300 кубкаў кавы
Ціханоўская пра выкраданьне Калесьнікавай: «Улады памыляюцца, калі думаюць, што гэта нас спыніць»
«Улада займаецца тэрорам, па-іншаму гэта не назавеш. Выкраданьне Марыі Калесьнікавай, Антона Раднянкова і Івана Краўцова — гэта спроба сарваць працу Каардынацыйнай рады і запалохаць яе чальцоў. Улады памыляюцца, калі думаюць, што гэта нас спыніць.
Чым больш яны запалохваюць, тым больш людзей будзе выходзіць на вуліцу. Мы працягнем барацьбу, будзем дамагацца вызваленьня ўсіх зьняволеных і правядзеньня новых сумленных выбараў», — заявіла Сьвятлана Ціханоўская.
Прэс-сакратар Пуціна назваў зьбіцьцё пратэстоўцаў у Менску і пабітае шкло ў кавярні «хуліганскімі выхадкамі»
Журналіст «Эхо Москвы» спытаўся сёньня ў прэс-сакратара Пуціна Дзьмітрыя Пяскова, ці лічыць Расея трывожным званком тое, што ў нядзелю ў Менску, апранутыя ў цывільную вопратку, зьбівалі дубінкамі іншых людзей і разьбілі ўваходныя дзьверы ў кавярню.
Карэспандэнта цікавіла, ці спатрэбіцца Расеі ўводзіць той самы рэзэрв сілавікоў ці гэта пакуль ня тое, пра што казаў Уладзімір Пуцін.
«Не. Безумоўна, гэта нейкія хуліганскія выхадкі. Мы ведаем па заяве нашых беларускіх калег, што яны ўжо правяраюць гэтую інфармацыю, гэтыя здымкі. Спадзяемся, што ў дадзеным выпадку беларускія праваахоўныя органы выканаюць сваю працу».
«Людзі ў цывільным» ходзяць па кватэрах, у якіх вывесілі бел-чырвона-белыя сьцягі
Студэнты праводзяць акцыі салідарнасьці ў сваіх установах
Больш за 170 000 чалавек напісалі ў плятформу «Голас», што пратэставалі 6 верасьня
171 618 чалавек зарэгістраваліся на інтэрнэт-плятформе «Голас» як удзельнікі пратэстных акцый 6 верасьня.
У ініцыятыве па падліку пратэстуючых прымалі ўдзел жыхары ўсіх абласьцей і Менску.
МУС налічыла 31 тысячу ўдзельнікаў 42 акцый пратэсту.
Міліцыя затрымала 633 чалавека.
У Магілёве на 810 рублёў аштрафавалі лідэра пратэставых акцый
Уладзімера Шанцава судзілі паводле чатырох пратаколаў за ўдзел у несанкцыянаваных акцыях. Шанцаў — старшыня абласной арганізацыі АГП, на мінулых выбарах быў даверанай асобай Сьвятланы Ціханоўскай.
Крэмль упершыню пракамэнтаваў «перахопленую размову» Ніка і Майка
У Крамлі азнаёміліся з запісам тэлефоннай размовы пра Аляксея Навальнага, якая была апублікаваная на беларускім тэлебачаньні, заявіў прэс-сакратар прэзыдэнта Расеі Дзьмітрый Пяскоў.
«Безумоўна, мы мелі магчымасьць лёгка азнаёміцца з матэрыялам СМІ. Ну, напэўна, ня нам судзіць аб карыснасьці і каштоўнасьці дадзенага запісу. Гэта, хутчэй, праца спэцыяльных службаў, што яны і робяць», — сказаў Пяскоў журналістам у панядзелак.
Адказваць на пытаньне пра давер да гэтага запісу Пяскоў ня стаў і спаслаўся ізноў на тое, што гэта праца спэцслужбаў.
Перахоплены, нібыта, беларускай выведкай аўдыёзапіс, быў апублікаваны 4 верасьня дзяржаўнымі тэлеканаламі. У ёй сьцьвярджаецца, што расейскі палітык Аляксей Навальны ня быў атручаны, а ўся справа вакол яго арганізаваная наўмысна, каб пакараць Пуціна за падтрымку Лукашэнкі пасьля выбараў. Упершыню пра гэты запіс заявіў сам Лукашэнка падчас сустрэчы з расейскім прэмʼерам Мішусьціным.
У Менску затрымалі айцішніка, які прапаноўваў Лукашэнку зьняцца з выбараў
Сярод затрыманых пасьля ўчорашняга «Маршу адзінства» апынуўся распрацоўнік мабільных праграм Канстанцін Канопка, паведамляе dev.by.
Мяркуючы па фота, відэа і паведамленьнях у Facebook, айцішнікаў і яшчэ некалькіх удзельнікаў мітынгу груба затрымалі ў сталічнай кавярні O’Petit, якая стала ўчора «героем» навін.
Там спрабавалі схавацца ўдзельнікі акцыі пратэсту, якія ўцякалі ад сілавікоў пасьля заканчэньня «Маршу адзінства». Супрацоўнік кавярні замкнуў памяшканьне, але гэта не спыніла невядомых у масках.
Яны разьбілі ўваходныя дзьверы і затрымалі мітынгоўцаў, у тым ліку Канстанціна Канопку.
Канстанцін Канопка — аўтар некалькіх ініцыятыў, рэалізаваных падчас выбарчай кампаніі. У ліпені ён запісаў відэазварот да Лукашэнкі, прапанаваўшы таму вызваліць затрыманых кандыдатаў у прэзыдэнты, а самому зьняцца з выбараў. Таксама ён зьвяртаўся да дзяржаўных службоўцаў з просьбай адмовіцца ад удзелу ў супрацьзаконнай дзейнасьці.
Акрамя таго, падчас перадвыбарчай кампаніі Канстанцін распрацаваў спэцыяльную паштоўку, якую рассылаў чальцам выбаркамаў з патрабаваньнем не займацца фальсыфікацыямі пры падліку галасоў.
Шукаюць сьведак затрыманьня Насты Захарэвіч і Арцёма Сізінцава
Беларуская асацыяцыя журналістаў просіць адгукнуцца сьведак працы і затрыманьня журналісткі Насты Захарэвіч у суботу на «Жаночым маршы» ў Менску. Яе няма ў даступных сьпісах зьняволеных у ізалятарах — дзе яна, невядома.
Тых, хто бачыў яе на маршы ці ў час затрыманьня, просяць тэлефанаваць на нумар +375 29 785-54-79.
Таксама БАЖ шукае тых, хто бачыў у калёне на Партызанскім праспекце журналіста Арцёма Сізінцава. Тэлефон +375 29 126-70-98.
Міністэрства ўнутраных справаў, Сьледчы камітэт і Камітэт дзяржаўнага кантролю заяўляюць, што «ня маюць інфармацыі» пра сёньняшняе выкраданьне Марыі Калесьнікавай. Камэнтар Камітэту дзяржаўнай бясьпекі пакуль не ўдалося атрымаць.
Лукашэнка сьвядома абвастрае адносіны з Захадам
Піша аглядальнік Свабоды Сяргей Навумчык
Учорашнія жорсткія затрыманьні і зьбіцьцё ўдзельнікаў мірных акцыяў па ўсёй краіне, сёньняшні захоп чальца прэзыдыюму Каардынацыйнай рады Марыі Калесьнікавай сьведчаць, што ўлады не зрабілі высноваў пасьля адносна мяккіх санкцый з боку некаторых краінаў Эўразьвязу.
Альбо наадварот, вырашылі сьвядома ігнараваць думку міжнароднай супольнасьці.
Такая пазыцыя можа тлумачыцца імкненьнем прадэманстраваць Крамлю яшчэ больш выразную антызаходнюю пазыцыю напярэдадні сустрэчы Лукашэнкі з Пуціным, мяркуе аглядальнік Свабоды Сяргей Навумчык
Дзень гораду пройдзе без традыцыйных масавых гуляньняў
Такое рашэньне прынялі ў сувязі з эпідэмічнай сытуацыяй. Перавагу аддалі лякальным акцыям, выставам, тэматычным урокам, гаворыцца ў тэлеграм-канале ўладаў Менску
Акцыя салідарнасьці зь Беларусьсю ў Манчэстэры, Вялікая Брытанія
Затрымалі і мастачку Надзею Саяпіну
Паводле Kyky.org, сёньня затрымалі і мастачку Надзею Саяпіну, аўтарку пэрфомансу супраць канфіскацыі карцінаў галерэі «Белгазпрамбанку».
Саяпіну павезьлі з дому ў Савецкі РУУС Менску нібыта для азнаямленьня з пратаколам аб удзеле ў несанкцыянаваным мерапрыемстве, але яе тэлефон «некалькі гадзінаў» недасяжны.
Марыю Калеснікаву выкралі ў цэнтры Менску невядомыя
Сябра прэзыдыюму Каардынацыйнай рады Марыю Калесьнікаву раніцай 7 верасьня каля Нацыянальнага мастацкага музею ў Менску невядомыя людзі пасадзілі ў мікрааўтобус з надпісам «Сувязь» і зьвезьлі невядома куды. Пра гэта Tut.by апавяла чытачка Анастасія, на вачах якой усё і адбылося.
Прэс-сакратар Каардынацыйнай рады Антон Раднянкоў сказаў, што Марыя была адна ў цэнтры гораду па сваіх справах, затым сувязь зь ім зьнікла. Дзе цяпер Марыя, у Радзе ня ведаюць. Максім Знак паведаміў, што ня можа зьвязацца з Марыяй.
Марыя Калесьнікава — сябра прэзыдыюму Каардынацыйнай рады. Да таго яна фактычна ўзначаліла штаб кандыдата ў прэзыдэнты Віктара Бабарыкі, затым была паплечніцай Сьвятланы Ціханоўскай.