Лінкі ўнівэрсальнага доступу

Затрыманых падчас акцыі журналістаў пакінулі ў РУУС да раніцы


Ілюстрацыйнае фота. Затрыманьні студэнтаў каля стадыёна «Дынама» ў Менску 1 верасьня
Ілюстрацыйнае фота. Затрыманьні студэнтаў каля стадыёна «Дынама» ў Менску 1 верасьня

Затрыманыя падчас асьвятленьня студэнцкай акцыі пратэсту журналісты застануцца ў РУУС Кастрычніцкага раёну прынамсі да раніцы.

Пра гэта праз тэлефон паведаміла карэспандэнтка Tut.by Надзея Калініна, якая знаходзіцца ў РУУС.

На якой падставе ўтрымліваюць журналістаў, высьветліць не ўдалося. Пры гэтым начальнік РУУС неаднаразова казаў, што журналістаў хутка вызваляць.

Таксама стала вядома, што прынамсі некаторым журналістам выстаўляюць абвінавачаньне за «ўдзел у несанкцыянаваным масавым мерапрыемстве» — артыкул 23.34 КаАП.

1 верасьня сілавікі затрымалі некалькі журналістаў, якія асьвятлялі акцыю пратэсту студэнтаў.

На вуліцы Кірава ў раёне стадыёну «Дынама» ў Менску ў 16.55 затрымалі журналістаў Tut.by Надзею Калініну і Аляксея Суднікава, фотакарэспандэнта БелаПАН Андрэя Шаўлюгу і журналіста-фрылансэра Васіля Сямашку. Там жа сілавікі затрымалі некалькі дзясяткаў студэнтаў, якія ішлі калёнай.

Таксама на маршы студэнтаў затрымалі супрацоўнікаў «Комсомольской правды в Беларуси»: фатографа Сьвятаслава Зоркага, апэратара Мікіту Недаверкава і карэспандэнта Марыю Эляшевіч.

Расейскае інфармагенцтва «РИА Новости» піша, што адным з затрыманых у Менску журналістаў быў іх карэспандэнт.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG