Аляксандр Васілевіч, кіраўнік агенцтва Vondel/Hepta, затрыманы. Пра гэта паведаміла ў фэйсбуку ягоная жонка Надзея Зелянкова. Сёньня ў офісах агенцтва прайшлі вобшукі.
Раніцай у офіс, які агенцтва Vondel/Hepta арандуе разам з рэдакцыяй інтэрнэт-выданьня КуКу, прыйшлі людзі з Дэпартамэнту фінансавых расьсьледаваньняў.
У выніку частка прышлых зьехала разам з Аляксандрам Васілевічам — дырэктарам агенцтва. Раней ён адседзеў 14 сутак за тое, што прынёс у КДБ заяву з хадайніцтвам за прэтэндэнта на прэзыдэнта Віктара Бабарыку.
Пакуль супрацоўнікі ДФР не выяўлялі жаданьня сустрэцца з журналістамі рэдакцыі, абмежаваўшыся гутаркамі з супрацоўнікамі Vondel/Hepta. Таму журналісты просяць калегаў не акцэнтаваць тое, што ператрус адбыўся менавіта ў рэдакцыях Kyky і The Village.
Дарэчы, The Village акурат сёньня апублікаваў турэмныя ўспаміны Аляксандра Васілевіча.
Разам з тым да дырэктаркі онлайн-выданьня Kyky Аляксандры Раманавай супрацоўнікі ДФР прыходзілі дадому. Яе там не аказалася, сілавікі спрабуюць шукаць яе праз тэлефон.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў