Лінкі ўнівэрсальнага доступу

У Магілёве на плошчы Славы сабраліся блізу 4 тысяч удзельнікаў маршу «За новую Беларусь»


Апошні раз на найстарэйшым пляцы гораду зьбіраліся апазыцыйна настроеныя гараджане ў 1996 годзе на Чарнобыльскі шлях. Пазьней плошча была месцам для афіцыйных імпрэзаў.

Цяпер пратэстоўцы разышліся па плошчы. Частка ўдзельнічае ў мітынгу, які праводзяць прыхільнікі Сьвятланы Ціханоўскай.


На мітынгу прамаўляюць у фармаце свабоднага мікрафону. Людзі кажуць пра гвалт, учынены сілавікамі пасьля выбараў, заклікаюць Лукашэнку сысьці ў адстаўку, заяўляюць, што пратэсты ня спыняць і што ўлада пакрывае сілавікоў.

Прамоўцаў перарываюць воклічы: «Не даруем!», «Жыве Беларусь!», «Ганьба!». Іншыя ўдзельнікі маршу фатаграфуюцца зь бел-чырвона-белымі сьцягамі на фоне ратушы. Утварылі ланцуг ля парапэтаў на Замкавай гары. Цяпер калёна зноў рухаецца ў бок плошчы Леніна, гукаючы традыцыйныя для пратэстаў споклічы.

Прыкладна пасьля 17.20 марш «За новую Беларусь» у Магілёве завяршыўся. Міліцыянты перакрылі плошчу Леніна, каб пратэстоўцы не вярнуліся на яе.

Супрацоўнікі ДАІ спынілі кіроўцу, які сыгналячы вітаў калёну і паказваў бел-чырвона-белы сьцяг. На мужчыну склалі пратакол за ня пройдзены тэхагляд. На спыненьне машыны пратэстоўцы адрэагавалі воклічамі «Адпускай!».

Прайшоўшы праз цэнтар гораду, удзельнікі акцыі разышліся групамі са сьцягамі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG