Лінкі ўнівэрсальнага доступу

Мора людзей на маршы ў Менску. Міністар абароны пагражае войскам. Што адбываецца ў Беларусі

Што адбываецца ў Беларусі на 15-ы дзень пратэстаў супраць фальсыфікацыі прэзыдэнцкіх выбараў, якія адбыліся два тыдні таму.

23:35 23.8.2020

Удзельнікі шэсьця зрабілі правільна, што не паспрабавалі паўтарыць «марш да тэлецэнтру», — аглядальнік Свабоды

У сацыяльных сетках выказваецца меркаваньне, што ўжо другая запар шматтысячная масавая акцыя праходзіць бяз «моцнага фіналу» — у адрозьненьні, напрыклад, ад рэкорднай на свой час маніфэстацыі ў лютым 1990-га, калі ўдзельнікі з плошчы перад Домам ураду рушылі да тэлецэнтру і дамагліся прамога эфіру для лідэраў БНФ.

Аднак прамыя паралелі з цяперашнім часам немагчымыя: пасьля разгону мітынгу ля Курапатаў з ужываньнем газавых балёнчыкаў на Дзяды-88, які атрымаў міжнародны розгалас, кіраўніцтва ЦК КПБ не выкарыстоўвала супраць мітынгтоўцаў сілу, ня кажучы ўжо пра спэцсродкі кшталту гумавых куляў, разважае аглядальнік Свабоды Сяргей Навумчык.

Падчас акцыі ў Менску 23 жніўня
Падчас акцыі ў Менску 23 жніўня

Для Лукашэнкі дапусьціць апанэнтаў у прамы эфір — азначае паказаць намэнклятуры і, што асабліва для яго небясьпечна, сілавікам, сваю слабасьць.

Таму няма сумневу, што ў выпадку аблогі тэлецэнтру была б прымененая сіла, супастаўляльная з той, якую беларусы ўбачылі ў першыя дні пасьля выбараў. А магчыма, і больш жорсткая.

На карысьць такога прагнозу сьведчыць і спроба дамагчыся эфіру, зробленая мітынгтоўцамі на Дзень Волі-96: тады спэцназ жорстка зьбіў дзясяткі людзей. А падставаў хвалявацца за ўладу ў Лукашэнкі ў 96-м было значна меней, чым сёньня, — лічыць аглядальнік Свабоды Сяргей Навумчык.

23:19 23.8.2020

Самыя яскравыя моманты «Маршу новай Беларусі»

Дзясяткі тысяч беларусаў гуляюць у цэнтры Менску, танцуюць каля калючага дроту і выступаюць за мірныя перамены. Глядзіце, што сёньня адбывалася ў Менску.

22:53 23.8.2020

Плякаты ля КДБ Беларусі. Фатафакт

Сёньня ля будынку КДБ Беларусі пратэстоўцы пакінулі плякаты з надпісамі «За справядлівы суд над карнікамі» і «Злачынствы – без пакараньняў, пакараньні – без злачынстваў. Беларусь 1994-2020». Побач да маленькіх цацачных шкілетаў прымацаваныя стужкі з імёнамі загінулых падчас пратэстаў у Беларусі.

22:27 23.8.2020

Затрыманьняў на акцыі апазыцыі ў Менску не было — МУС Беларусі

Афіцыйны прадстаўнік МУС Беларусі Вольга Чамаданава паведаміла, што на акцыі пратэсту ў Менску затрыманых няма. «У Менску ніхто не затрымліваўся. Па краіне інфармацыя яшчэ ўдакладняецца», — сказала яна «Інтэрфаксу».

Чамаданава ўдакладніла, што таксама пакуль няма інфармацыі аб колькасьці мітынгоўцаў. Гэта інфармацыя, як чакаецца, будзе агучана ведамствам 24 жніўня.

22:25 23.8.2020

Лукашэнка з аўтаматам — кепскі піяр ці грознае папярэджаньне? — палітычны аглядальнік Свабоды

Расейскія і беларускія прапагандысты ўпарта ўплішчваюць у розумы аўдыторыі, што пратэст ідзе на спад. Тое самае сказаў і міністар замежных справаў Расеі, маўляў, сытуацыя ў Беларусі нармалізуецца, адзначае палітычны аглядальнік Свабоды Юры Дракахруст. І тут карцінка, якая разбурае ўсю гэтую паліттэхналягічную прыгажосьць. Вярхоўны галоўнакамандуючы бярэ зброю ў рукі толькі ў самы апошні момант, на краі. Гэта проста ніяк не стасуецца з байкай пра спад.

Але ня выключана, што Лукашэнка думае зусім не пра піяр. Карцінка з аўтаматам стасуецца з заявай міністра абароны Хрэніна аб магчымасьці ўжываньня войска супраць пратэстоўцаў.

Войска — гэта не паліцыя. Яго функцыя не падаўляць, не нэўтралізоўваць, не прадухіляць. Ужо як гэта робяць праваахоўнікі, усе даведаліся 9-11 жніўня. Але функцыя ў войска наагул іншая і адна — забіваць ворага. У сьвятле заявы Хрэніна дэманстратыўна паказаная зброя ў руках Лукашэнкі можа проста азначаць гатоўнасьць прабіць яшчэ адно дно.

Некалі даўно былы рэдактар «Советской Белоруссии» Павал Якубовіч распавядаў мне пра жалезнае правіла з кодэксу «злодзеяў у законе». Якубовіч ведаў гэта па сваёй службе ўва ўнутраных войсках. Дык вось правіла — ні ў якім выпадку нельга палохаць зброяй. Дастаў нож — бі, дастаў пісталет — страляй. Па гэтым законе жыве сьвет злодзеяў.

Напэўна, Якубовіч і Лукашэнку пра гэта закон распавядаў. Пытаньне — якую выснову зрабіў Лукашэнка з гэтага распавяду — піша палітычны аглядальнік Свабоды Юры Дракахруст.

22:22 23.8.2020

«Рэжыму адназначна прыйшоў канец», — сьпявачка Анжаліка Агурбаш на акцыі пратэсту ў Маскве

Заслужаная артыстка Беларусі, сьпявачка Анжаліка Агурбаш, якая шмат гадоў жыве ў Маскве, прыйшла на акцыю пратэсту да беларускай амбасады, каб «падтрымаць мірных беларусаў, якія сёньня выходзяць на мітынгі і маршы, рабочых, якія бастуюць у Беларусі».

«Усе мы змагаемся за сябе, за сваіх дзяцей, за будучыню ўсімі любімай Беларусі, — сказала яна тэлеканалу „Дождь“. — У кожнага з нас баліць душа і сэрца за тое, што цяпер робіцца. (...) Мы хочам жыць бяз страху ў свабоднай, дэмакратычнай краіне. Мы хочам сумленных выбараў, мы хочам жыць, працаваць, любіць, сьпяваць любімыя песьні бяз страху, без тэрору, гвалту і агрэсіі», — дадала артыстка.

22:18 23.8.2020

У Берасьці на «Марш новай Беларусі» выйшлі каля 10 тысяч чалавек

Акцыя ў Берасьці пачалася пасьля 14.00 на плошчы Леніна. Людзі прыйшлі зь бел-чырвона-белымі сьцягамі і скандавалі «Сыходзь!», «Лукашэнка — у аўтазак!», «Жыве Беларусь!», «Няма гвалту!» і інш. У 16.30 прысутныя калёнай пад вялікім бел-чырвона-белым сьцягам рушылі па горадзе, падчас руху да калёны далучаліся новыя людзі. Шэсьце завяршылася каля 21.30 на плошчы Леніна. Агулам у маршы прынялі ўдзел каля 10 тысяч чалавек, паведамляе БелаПАН.

22:12 23.8.2020

Вялікі фотарэпартаж Свабоды з «Маршу новай Беларусі» ў Менску

22:08 23.8.2020

21:57 23.8.2020

«Мы да канца! Мы з вамі да канца!» — АМАПаўцы Лукашэнку

Як паведаміла прэс-сакратарка Лукашэнкі Натальля Эйсмант, ён увесь дзень з самай раніцы быў у Палацы незалежнасьці, «кантраляваў абстаноўку». Бліжэй да вечара, як кажа Эйсмант, «калі так званыя мітынгоўцы пайшлі можна сказаць на своеасаблівы штурм будынка», Лукашэнка таксама знаходзіўся ў Палацы. Пасьля ён выклікаў верталёт і абляцеў горад.

«З вышыні паглядзеў на так званы мітынг. Таксама кантраляваў абстаноўку. Вярнуўшыся неўзабаве ў Палац Незалежнасьці, перш за ўсё прэзыдэнт падзякаваў хлапцам — тых, хто абараняў Палац па пэрымэтры. Таксама падышоў і да хлопцаў з АМАПу, пагутарыў зь імі, падзякаваў і ім», — сказала Эйсмант.

«Мы да канца! Мы з вамі да канца!» — закрычалі яму ў адказ АМАПаўцы.

«Разьбярэмся», — дадаў Лукашэнка.

21:04 23.8.2020

У Кіеве працягваецца акцыя салідарнасьці зь Беларусьсю. Фота

20:59 23.8.2020

«Пазыцыя робіцца больш жорсткай». Як глядзіць Масква на беларускі палітычны крызіс

Юры Дракахруст аналізуе заявы міністра замежных справаў Расеі Сяргея Лаўрова наконт сытуацыі ў Беларусі, зробленыя сёньня на міжнародным моладзевым форуме «Тэрыторыя сэнсаў».

Сьцісла:

  • Тэзы Лаўрова хутчэй пацьвярджаюць інфармацыю пра тое, што Ўладзімір Пуцін прыняў рашэньне падтрымаць у беларускім супрацьстаяньні Аляксандра Лукашэнку
  • Некаторыя выказваньні Лаўрова дакладна супадаюць з асноўнымі наратывамі, якія прасоўваюць у Беларусі расейскія адмыслоўцы па прапагандзе
  • Пазыцыя Масквы робіцца больш жорсткай — яна адмаўляецца нават ад вельмі мяккай крытыкі Лукашэнкі і ад ідэі вонкавага пасярэдніцтва ў беларускім крызісе
  • Лукашэнку даецца індульгенцыя на прымальную для яго форму дыялёгу з грамадзтвам
  • Масква ня робіцца сабакам, якім круціць хвост, яна захоўвае свабоду манэўру ў залежнасьці ад хады падзеяў у Беларусі і прапановаў заходніх партнэраў.

Артыкул цалкам чытайце па спасылцы.

20:51 23.8.2020

У Маскве затрымалі 11 удзельнікаў «ланцугу салідарнасьці» ля амбасады Беларусі

У Маскве каля амбасады Беларусі, дзе праходзіць акцыя салідарнасьці з пратэстоўцамі супраць Аляксандра Лукашэнкі, затрымалі сама меней 11 чалавек, паведаміў «ОВД-Инфо» адзін з затрыманых, музыка гурту Rodonitza Алег Клімаў. Акцыя ля амбасады Беларусі пачалася каля 15-ай гадзіны, да яе далучыліся каля 150 чалавек.

20:42 23.8.2020

Мірны характар масавых пратэстаў умацоўвае пазыцыі апанэнтаў Лукашэнкі, — аглядальнік Свабоды

Нават калі б сёньня акцыі праціўнікаў Лукашэнкі былі нешматлюднымі, гэта не зьмяніла б стаўленьня лідэраў дэмакратычных краінаў да вынікаў выбараў: Лукашэнка ня можа лічыцца абраным прэзыдэнтам з прычыны татальных фальсыфікацыяў, лічыць аглядальнік Свабоды Сяргей Навумчык.

Між іншым, гэтая пазыцыя карэнным чынам адрозьніваецца ад той, якую Захад займаў на ранейшых выбарах — тады гаварылася пра іх недэмакратычнасьць, ціск на апанэнтаў, нядопуск назіральнікаў, але факт перамогі Лукашэнкі збольшага не аспрэчваўся. Цяпер кіраўнік дыпляматыі ЭЗ Жузэп Бурэль наўпрост заявіў, што Эўропа не прызнае Лукашэнку абраным прэзыдэнтам.

Акцыя ў Менску 23 жніўня
Акцыя ў Менску 23 жніўня

Масавыя акцыі пратэсту, якія цягнуцца ў Беларусі ўжо два тыдні і ня сьцішваюцца, пераканалі сусьветную супольнасьць у тым, што калі і ня ўвесь беларускі народ, дык значная ягоная частка не прымае Лукашэнку ў якасьці кіраўніка дзяржавы.

І асаблівае ўражаньне робіць мірны характар пратэстаў: стотысячныя шэсьці — і ніводнай разьбітай вітрыны, ніводнага перакуленага аўтамабіля. Эўропа такога ня бачыла даўно. ЗША, зрэшты, таксама, — падсумоўвае аглядальнік Свабоды Сяргей Навумчык.

20:13 23.8.2020

А1 патлумачыла перабоі з інтэрнэтам «забесьпячэньнем нацыянальнай бясьпекі»

23 жніўня пасьля 18-й гадзіны ў Менску пачаліся перабоі з інтэрнэтам. Праблемы, як з мабільным, так і са стацыянарным інтэрнэтам мелі карыстальнікі шэрагу буйных апэратараў.

Прэс-служба мабільнага апэратара A1 «з шкадаваньнем паведаміла» на афіцыйнай старонцы ў Фэйсбуку, што «згодна з патрабаваньнем дзяржаўных органаў у сувязі з забесьпячэньнем нацыянальнай бясьпекі істотна зьніжаная прапускная здольнасьць 3G-сеткі А1 на тэрыторыі некаторых раёнаў Менску. Выкананьне дадзенага патрабаваньня прыводзіць да пагаршэньня якасьці сэрвісу перадачы дадзеных.

Аб аднаўленьні карэктнага доступу да паслугі будзе паведамлена дадаткова. Прыносім прабачэньні і спадзяемся на хуткае аднаўленьне абслугоўваньня».

19:47 23.8.2020

Лукашэнка прыляцеў у палац Незалежнасьці з аўтаматам. Відэа

Блізкі да Аляксандра Лукашэнкі тэлеграм-канал «Пул первого» выклаў відэа, на якім бачна, як ён прыляцеў у палац Незалежнасьці на верталёце — у бронекамізэльцы і з аўтаматам у руках (праўда, без магазына з патронамі). Раней відавочцы паведамлялі, што верталёт праляцеў над пратэстоўцамі.

Прэс-сакратарка Лукашэнкі Натальля Эйсмант пацьвердзіла ў эфіры БТ, што малодшы сын кіраўніка дзяржавы Мікалай быў разам зь ім у Палацы Незалежнасьці.

Яна распавяла, што ўвесь сёньняшні дзень з самай раніцы Лукашэнка працаваў у сытуацыйным цэнтры ў Палацы незалежнасьці, «кантраляваў абстаноўку». Камэнтар прэс-сакратаркі апублікаваў і «Пул Первого».

Раней у тэлеграм-канале «Пул Первого» зьявілася відэа, на якім быў бачны малады чалавек са зброяй і ў бронекамізэльцы. Блогеры дапускалі, што гэта Мікалай Лукашэнка. Цяпер гэта пацьверджана афіцыйна.

19:46 23.8.2020

Акцыя салідарнасьці ў Львове

Ва ўкраінскім Львове каля 2 дзясяткаў чалавек, нягледзячы на моцны дождж, сталі ў ланцуг на праспэкце Свабоды каля помніка Шаўчэнку.

19:43 23.8.2020

«Ланцуг салідарнасьці» ў Кіеве

Украінцы, беларусы і азэрбайджанцы прыйшлі да амбасады Беларусі ў Кіеве перад пачаткам чарговага «ланцуга салідарнасьці».

19:29 23.8.2020

Акцыя салідарнасьці зь беларусамі ў Барсэлёне. Фатафакт

19:28 23.8.2020

Менск: людзі вяртаюцца ад стэлы ў цэнтар

19.20 Людзі вяртаюцца ад стэлы ў цэнтар гораду. Калёна заняла ўвесь праспэкт Пераможцаў. Тысячы людзей ідуць са сьцягамі, крычаць «Перамога». Іх вітаюць машыны.

Ад адміністрацыі Лукашэнкі адводзяць вадамёты, іншую спэцтэхніку і АМАП са шчытамі.

Каля стэлы салдаты ў ачапленьні ўсё яшчэ стаяць. Да іх актыўна падыходзяць дэманстранты і пра нешта гутараць.

Загрузіць яшчэ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

XS
SM
MD
LG