Пра падтрымку страйкоўцаў на Беларускай тэлевізіі і іншых вяшчальнікаў заявіў Саюз журналістаў Нямеччыны, піша БелаПАН.
«Ад імя больш як 30 тысяч нашых чальцоў выказваю салідарнасьць з вамі і натхняю на барацьбу за свабоду СМІ ў вашай краіне мірнымі сродкамі», — заявіў старшыня саюзу Франк Юбэраль.
Паводле яго, той факт, што людзі нарэшце пачалі выступаць за рэалізацыю фундамэнтальнага права на свабоду СМІ і думак, ёсьць цудоўным сыгналам надзеі для краіны, якая да гэтага журналістаў бязьлітасна ўціскала.
У сувязі з гэтым Юбэраль выказаўся за тое, каб міжнародныя арганізацыі, закліканыя клапаціцца пра свабоду масмэдыя, ясна выказалі сваю пазыцыю.
«Міжнародная грамадзкасьць не павінна дазволіць Аляксандру Лукашэнку з выкарыстаньнем грубай сілы перасьледаваць апазыцыянэраў і журналістаў як ворагаў дзяржавы», — падкрэсьліў кіраўнік саюзу.
Зварот пра намер пачаць забастоўку падпісалі каля 300 супрацоўнікаў Белтэлерадыёкампаніі, дзясяткі падалі заявы на звальненьне, частка звольнілася раней.
21 жніўня Аляксандар Лукашэнка заявіў, што запрасіў з Расеі «дзьве-тры групы журналістаў» на месца пратэстоўцаў з БТ.
