Лінкі ўнівэрсальнага доступу

«Едзьце да яе. Штаб у Літве». На акцыю пад чырвона-зялёнымі сьцягамі ў Горадні прыйшлі 30 чалавек


Мітынг у падтрымку Лукашэнкі ў Горадні

Акцыя «Пункт супакою» прайшла ў горадзенскім парку Жылібера пад балёнікамі зялёнага і чырвонага колеру 20 жніўня. На яе прыйшло каля 30 чалавек.

Пікет зьявіўся ў парку Жылібера каля 16 гадзіны. Маладзёны ў белых кашулях з надпісамі «За Беларусь» раздавалі паштоўкі і чырвона-зялёныя стужкі. Запрашалі на мітынг «Любімую не аддамо» на плошчы Леніна 22 жніўня.

«А мы думалі, што сёньня мітынг. Ва ўсіх навінах перадалі, што а 16-й», — засмуціліся жанчыны, што прыйшлі ў час.

«Бярыце з сабой плякаты, сьцяжкі», — заахвочвалі маладзёны.

«У нас заходняя частка краіны. Таму нас так няшмат. Вось у Гомлі дык шмат за Лукашэнку», — прамаўляў да некага мужчына ў форме, падобнай да вайсковай.

«Які жах!», — пасьпела сказаць жанчына з малой дачкой, якія ў сьветлых кашульках праходзілі паўзь пікет.

«Ганьба!», — закрычала яшчэ адна дзяўчына, аддаляючыся ад акцыі.

«Валіце з краіны, каб нагі вашай тут не было, на польскія градкі», — абурылася жанчына, што прыйшла на акцыю.

Паміж сталымі гарадзенкамі, што стаялі побач зь пікетам, завязалася гучная гутарка.

«Хочуць у NATO, хай ідуць у NATO. А мы з Расеяй будзем сябраваць», — заявіла адна.

«Мы непераможныя. Не аддамо!», — падтрымала іншая.

«Яна ў Літве. Едзьце да яе. Штаб у Літве», — прапанавала некаму трэцяя.

«Нашу міліцыю машынай зьбівалі, і гэта нармальна. А потым яны са сцэны сінія дупы паказваюць. Чаго ты туды ішоў? Яны самі спэцыяльна лезуць, а потым прыкідваюцца. Самі сабе кухталёў наробяць», — актыўна абуралася гарадзенка.

«Прыйшлі на ўсё гатовае. Ім падабаецца тут жыць. У нас доўгі вялікі сьцяг, яшчэ даўжэйшы, чым той белы, фашыстоўскі. „За бацьку!“ Усе крычаць „За бацьку!“», — казала яшчэ адна.

«У нас акцыя праходзіць па ўсёй краіне, ва ўсіх гарадах, усіх запрашаем на мітынг за незалежнасьць нашай краіны. Паштовачку можаце родным перадаць. Вазьміце стужачку», — ветліва і нясьмела казалі маладзёны новенькім, хто да іх падыходзіў.

У пікавы момант каля пікету прысутнічала 30 чалавек у радыюсе 25 мэтраў, з улікам арганізатараў і журналістаў.

«Можна я вас здыму са сьцяжком?», — падбегла да аднаго з удзельнікаў акцыі маладая журналістка зь дзяржаўнага выданьня.

«За Беларусь! Здорава! За спакой! Стабільнасьць!», — выгукваў жаночы голас.

«Зараз мы гэтую масавасьць здымем», — з усьмешкай адышоўся далей апэратар мясцовага тэлебачаньня.

«Я змучылася», — пачала скардзіцца сталая жанчына.

«Я сама змучылася, — працягнула другая. — А міністар аховы здароўя? Яго нават пальчыкам нельга кранаць. А яны... За гэта можна ў суд падаць за абразу асобы. Я прыйшла б і расказала, як раней галадалі».

«А навошта ім працаваць? — падтрымала яе каляжанка. — Ім заплацяць, і ўсё. Нам крывавыя грошы не патрэбныя. Мы ўжо з мужам палічылі, па 5 эўра», — абмяркоўвалі нечыя грошы паплечніцы.

«Здраднікі радзімы. Я так і называю», — акрэсьліла ўдзельніца гэтай дружнай кампаніі.

«Я кажу, каб не было вайны. Моладзь кажа: „Хай ён сыдзе, і вайны ня будзе“. А чаму ён павінен сыходзіць? Мы ім ганарымся. Няма чаго саромецца, што ён з калгасу. Мы таксама зь вёскі», — ішла далей гутарка.

«Украіну развалілі, цяпер нас, а потым і да Расеі дабяруцца», — перажывала гарадзенка.

«Мяне за іхнія мерапрыемствы звычайна дэпрэмуюць, бо ня так зьняў», — паскардзіўся на некага фатограф дзяржаўнага выданьня.

«Відаць, тут нічога ня будзе адбывацца», — адзначылі тэлевізійнікі, якія запісалі ўжо камэнтары некалькіх удзельнікаў, і зьняліся з працоўнага пункту.

«За якія перамены? У нас усё ў парадку, — працягвалі весьці дыскусію зь нябачнымі апанэнтамі сталыя жанчыны. — На якіх яны машынах езьдзяць, на мэрсэдэсах. Яны яшчэ больш грошай хочуць. Яны родную бабулю прададуць».

«Каб яму толькі хапіла здароўя гэта ўсё перажыць», — падсумавала прыхільніца дзейнай улады і пайшла зь пікету.

Роўна а 17 гадзіне пікет зьняўся зь месца і зьнік. Углыб парку аддаляліся балёнікі.

У не дазволеным уладамі мітынгу прыхільнікаў перамен сёньня ў Горадні ўдзельнічалі паўтары тысячы чалавек.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG