Сям‘я Рамана Шабановіча зь Менску некалькі дзён ня мае зь ім кантактаў.
«Муж з 12-гадовай дачкой ехалі на гэтым грузавіку, ужо вярталіся дамоў. На Партызанскім праспэкце Менску іх спынілі некалькі экіпажаў ДАІ і хацелі затрымаць, — распавядае жонка Рамана Ларыса. — Але там было шмат удзельнікаў акцыі, жанчыны, дзеці, і яны зрабілі такі калідор для мужа і дачкі, і тыя сышлі. А машына засталася на праспэкце стаяць».
Па словах сьведак, машыну атачылі людзі ў масках. Машыну шукалі суткі, знайшлі 17 жніўня на стаянцы на вуліцы Трасьцянецкай. На выгляд яна цэлая, але пад кабінай нейкая вадкасьць.
«Муж даслаў фатаздымак агляду транспартнага сродку, машына арыштаваная, — кажа Ларыса. — Пасьля муж пазваніў, расказаў, што калі ён сыходзіў са стаянкі, каля яго спыніўся цёмны аўтамабіль з расейскімі нумарамі, адтуль выскачылі людзі, пачалі яго зьбіваць, пацягнулі некуды». Дзе цяпер муж, Ларыса ня ведае. Яна напісала заяву, каб ёй як уладальніцы аўтамабіля вярнулі транспартны сродак і патлумачылі прычыны арышту.
«Зразумела, што за сьцяг прычапіліся, — кажа Ларыса. — Аніякіх парушэньняў правіл дарожнага руху там не было».
У сям’і Шабановічаў 4 дзяцей. Старэйшы сын, 16-гадовы Рэнат, быў затрыманы на ровары 7 жніўня, атрымаў чэрапна-мазгавую траўму, у яго часткова зьнікла памяць.
