«Ідэалягічная падрыхтоўка была такая: калі дзейная ўлада пацерпіць паразу, то кожнага з нас [супрацоўнікаў міліцыі] будуць вешаць на суках пры дарозе. Таму абараняць гэтую ўладу трэба любымі сродкамі і спосабамі».
Партал tut.by запісаў аповед падпалкоўніка міліцыі зь Ліды, камандзіра роты Юрыя Махнача.
Яшчэ ў чэрвені яму ад намесьніка начальніка Лідзкага РАУС Дзяніса Аўраменкава паступіў загад разганяць мірны пікет у Лідзе.
Туды выйшлі, паводле Махнача, мірныя людзі — пэнсіянэры, мужчыны, жанчыны зь дзецьмі і вазочкамі, якія нічога дрэннага не рабілі. Ён адмовіўся выконваць загад начальства, які, у сваю чаргу, прыйшоў зьверху, ад намесьніка начальніка УУС Горадзенскага аблвыканкаму Аляксандра Шастайлы.
Падчас перадвыбарчай кампаніі пачалася «рэальная падрыхтоўка органаў унутраных спраў да вайны супраць свайго народу», — кажа Махнач. «Ідэалёгія была такая: калі дзейная ўлада пацерпіць паразу, то кожнага з нас будуць вешаць на суках пры дарозе. Таму гэтую ўладу трэба абараняць любымі сродкамі і спосабамі», — пераказвае ён.
«У Лідзе адбываліся страшныя рэчы: білі людзей на тэрыторыі РАУС, зьбівалі і катавалі ў аўтазаках, на мыйцы аўтатранспарту РАУС». Юры Іванавіч кажа, што гэта рабілі супрацоўнікі АМАПу Горадзенскага аблвыканкаму і супрацоўнікі Лідзкага РАУС. У той момант сам ён быў у адпачынку — бо яшчэ перад выбарамі зразумеў, што ня можа хадзіць на працу.
У Лідзкім РАУС 13 афіцэраў не пагадзіліся са зьбіцьцём і катаваньнямі людзей і «з узьнятай галавой» падалі рапарты аб звальненьні. Яны гатовыя даваць паказаньні аб фактах супрацьпраўных дзеянняў на тэрыторыі Лідзкага РАУС.
Махнач служыў у міліцыі 23 гады і ніколі ня мог падумаць, што так павернецца: «Што мы пачнем ставіцца па-зьверску і па-быдлячаму да людзей сваёй краіны. Мне сорамна насіць пагоны».
18 жніўня Юры Іванавіч павінен выйсці на працу, каб падаць рапарт аб звальненьні.
