Лінкі ўнівэрсальнага доступу

«Дыялёг немагчымы». Каля будынку АНТ страйкуюць супрацоўнікі. ФОТА


Ілюстрацыйнае фота
Ілюстрацыйнае фота

Карэспандэнт Свабоды перадае, што каля будынку АНТ страйкуюць каля 10 супрацоўнікаў АНТ. Яны выйшлі з плякатам «АНТ за свабоду слова».

Іх падтрымліваюць іншыя ўдзельнікі акцыі салідарнасьці. Людзі застаюцца каля будынку, сюды падвозяць ваду і раздаюць печыва, аўтамабілі сыгналяць у падтрымку. Цэнтральны ўваход у будынак зачынены.

Свабода пагутарыла з супрацоўніцай АНТ пра тое, чаму тая далучылася да забастоўкі.

«Мы выйшлі, бо ня згодныя з тым, што адбываецца ў краіне. Спрабавалі размаўляць з кіраўніцтвам, каб зьмякчыць палітыку на тэлеканале, але нічога не мяняецца. Мы зразумелі, што дыялёг немагчымы. Зразумелі, што толькі страйкам можам паўплываць на тое, што адбываецца».

Цяпер, зь яе словаў, 25 чалавек падпісалі агульны ліст з патрабаваньнямі, але на канале працуюць каля 280 чалавек. Шмат хто, кажа яна, звольніўся яшчэ раней. Жанчына тлумачыць, чаму супрацоўнікі могуць баяцца далучацца да страйку. Напрыклад, яна будуе жытло і падпісала абавязаньне не звальняцца 5 гадоў. Калі звальняецца, то мусіць выплаціць камэрцыйны кошт жытла.

«Але момант, калі гэтыя абавязаньні ня маюць ужо аніякага значэньня, наступіў, — кажа жанчына. — Хаця я думаю, шмат у каго такая ж сытуацыя».

У пратэсьце бярэ ўдзел лідэр сацыял-дэмакратаў Ігар Барысаў. Ён заклікаў ствараць страйкамы, каардынавацца і прызнаваць Сьвятлану Ціханоўскую прэзыдэнтам. Ён паведаміў, што на БТ пададзена заява на прадастаўленьне партыям, незалежным прафсаюзам, грамадзкім арганізацыям жывога эфіру, каб расказаць пра сытуацыю ў краіне.

Такая ж заява будзе пададзена кіраўніцтву СТВ і АНТ.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG