Лінкі ўнівэрсальнага доступу

У магілёўскім ізалятары галадаюць супраць незаконнага зьняволеньня двое журналістаў


Зьіцер Салаўёў, архіўнае фота
Зьіцер Салаўёў, архіўнае фота

Уладзімер Лапцэвіч галадае 6-я суткі. Зьміцер Салаўёў — 4-я. Абодвух Ленінскі суд Магілёва прызнаў вінаватымі ў непадпарадкаваньні патрабаваньням міліцыі.

Уладзімеру Лапцэвічу, які супрацоўнічае зь мясцовымі і замежнымі мэдыя, прысудзіла 12 сутак адміністрацыйнага арышту судзьдзя Вікторыя Палякова. Галоўнаму рэдактару інтэрнэт-парталу «6tv.by Магілёўскі рэгіён» Зьмітру Салаўёву прысудзілі 8 сутак. Ягоную справу разглядалі ў ізалятары. Хто старшыняваў на працэсе, невядома.

Уладзімер Лапцэвіч з абдзерынай на лобе. Пашкоджаньне нанесена ў міліцыі
Уладзімер Лапцэвіч з абдзерынай на лобе. Пашкоджаньне нанесена ў міліцыі

У ізалятары Лапцэвічу «не паложана» чытво і цёплыя рэчы

Уладзімер Лапцэвіч галадае ад 6 жніўня. Жонка Натальля нічога ня ведае пра здароўе мужа ў няволі. Атрымаць такія зьвесткі яна ня можа. Кажа, што ён пакутуе ад гіпэртаніі і што мэдыкамэнты, якія стабілізуюць ціск, яму перадалі. На час зьняволеньня іх павінна хапіць. У ізалятар Натальля рэгулярна носіць ваду.

Цяпер перадаць яе будзе няпроста, бо каля ізалятара з раніцы зьбіраюцца да сотні чалавек, каб перадачамі падтрымаць сваіх зьняволеных родзічаў. За гадзіну прымаюць 4–6 чалавек. Натальля кажа, што першую яе перадачу з чатырох найменьняў прымалі 35 хвілін.

Каля магілёўскага ізалятара
Каля магілёўскага ізалятара

Па яе словах, зь цёплых рэчаў супрацоўнікі ізалятара дазволілі перадаць толькі майку з рукавамі, а пра астатняе сказалі, што гэта «рэчы ня першай неабходнасьці. Тое самае было заяўлена пра чытво, асадку і паперу.

Уладзімера Лапцэвіча затрымалі 5 жніўня, калі ён як чалец юрыдычнай службы Беларускай асацыяцыі журналістаў прыйшоў у Ленінскі аддзел міліцыі Магілёва высьветліць лёс калегі Аляксандра Буракова і праваабаронцы Аляксандра Хамратава.

На судзе 7 жніўня журналіст сьцьвярджаў, што ў міліцыі яго зьбілі. З ізалятара, дзе яму стала кепска, вазілі ў лякарню. Адтуль пра пабоі паведамілі ў Сьледчы камітэт, а той пачаў праверку і выдаў накіраваньне на судова-мэдычную экспэртызу. Лапцэвіч даводзіў, што ў ізалятары яму не даюць магчымасьці прайсьці агляд і зафіксаваць пашкоджаньні.

На рукі Лапцэвіча начэплівалі кайданкі. Журналіст казаў, што міліцыянты пагражалі зрабіць яму «ластаўку»
На рукі Лапцэвіча начэплівалі кайданкі. Журналіст казаў, што міліцыянты пагражалі зрабіць яму «ластаўку»

Хто судзіў Салаўёва і чаму на суд у ізалятар не пусьцілі жонку

Зьмітра Салаўёва затрымалі 8 жніўня супрацоўнікі ДАІ. Яны заявілі, што ён езьдзіць на скрадзенай машыне, а ў Ленінскім аддзеле міліцыі на яго склалі пратакол аб непадпарадкаваньні сілавікам. Пра галадоўку ён паведаміў жонцы Надзеі. Ад 8 жніўня яна пра мужа нічога ня ведае.

Зьміцер Салаўёў, архіўнае фота
Зьміцер Салаўёў, архіўнае фота

11 жніўня яна спрабавала трапіць на разгляд мужавай справы як ягоны законны прадстаўнік, але яе не пусьцілі, не патлумачыўшы прычыны. 12 жніўня ў канцылярыі Ленінскага суду Магілёва жанчыне паведамілі, што Зьмітра асудзілі на 8 сутак. Хто разглядаў справу, там ня ведаюць. У абвестцы пра суд было адзначана, што Салаўёва будуць судзіць за ўдзел у несанкцыянаваным мерапрыемстве, але пакаралі за непадпарадкаваньне.

Надзея Салаўёва
Надзея Салаўёва

Суразмоўніца кажа, што мужу носіць у ізалятар ваду. У яе прынялі цёплыя шкарпэткі, швэдар і газэты. Перадачы прымаюць без абмежаваньняў.

«У мужа праблемы са страўнікам, дык ён шмат п’е мінэральнай вады, — кажа Надзея Салаўёва. — У яго таксама нестабільны ціск, і ён прымае адмысловыя мэдыкамэнты. Я спадзявалася пабачыць мужа на судзе, каб перадаць іх. Цяпер буду спрабаваць гэта зрабіць заўтра, але чарга каля ізалятара вялікая».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG