Петразаводзкі гарадзкі суд прысудзіў карэльскаму гісторыку, кіраўніку карэльскага аддзяленьня таварыства «Мемориал» Юрыю Дзьмітрыеву тры з паловай гады калёніі ў справе аб гвалтоўных дзеяньнях сэксуальнага характару, учыненых у дачыненьні да яго прыёмнай дачкі.
Як паведамляецца на сайце суду, Дзьмітрыева прызналі вінаватым у гвалтоўных дзеяньнях сэксуальнага характару, але апраўдалі паводле абвінавачаньняў у вырабе дзіцячай парнаграфіі і распусных дзеяньнях. Раней ён быў прызнаны вінаватым у захоўваньні зброі за знойдзеныя ў яго пры ператрусе фрагмэнты стрэльбы і тады яму было прызначана абмежаваньне волі тэрмінам на два з паловай гады.
Паводле цяперашніх абвінавачаньняў пракуратура запрасіла для яго 15 гадоў калёніі строгага рэжыму.
З улікам адбытага часу ў СІЗА Дзьмітрыеў выйдзе на свабоду 12 лістапада.
Кіраўнік карэльскага «Мемориала» — вядомы гісторык і краязнаўца, які расьсьледаваў злачынствы сталінскіх часоў. Менавіта ён знайшоў масавае пахаваньне Сандармох ў Карэліі, дзе ў канцы 30-х гадоў XX стагодзьдзя былі пахаваныя тысячы арыштаваных, расстраляных НКУС.
Дзьмітрыева арыштавалі ў сьнежні 2016 году. Цяперашняя справа — ужо другая справа паводле «пэдафільскага» артыкулу, якую ў дачыненьні да яго завялі. Па першай суд яго апраўдаў, але Вярхоўны суд Карэліі адмяніў апраўдальны прысуд і адправіў справу на перагляд.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў