Лінкі ўнівэрсальнага доступу

Беларускія акцыі салідарнасьці 18 ліпеня: Кракаў, Бэрлін, Барсэлёна, Беласток, Кіеў, Тэль-Авіў, Дэнвэр. ФОТА, ВІДЭА

абноўлена

Паштоўкі ад беларусаў Барсэлёны палітвязьням на радзіме
Паштоўкі ад беларусаў Барсэлёны палітвязьням на радзіме

Акцыі салідарнасьці з палітвязьнямі ў Беларусі і ў падтрымку дэмакратычных зьменаў працягваюць адбывацца ў розных гарадах сьвету.

Кракаў

У Кракаве адбылася акцыя салідарнасьці зь Беларусьсю, паведамляе ўдзельнік акцыі Аляксей. Нягледзячы на дождж, на акцыю прыйшло каля 100 чалавек – акрамя беларусаў і неабыякавыя палякі. Пратэстоўцы скандавалі «Жыве Беларусь!», на плякатах былі напісы «Я/Мы 97%» і заклікі да міліцыі стаць на бок народу, усім быў даступны адкрыты мікрафон. Арганізатары абвясьцілі аб стварэньні ў Кракаве беларускай некамэрцыйнай арганізацыі для аб'яднаньня шматлікай супольнасьці беларусаў гораду.


Бэрлін

Акцыя беларускай салідарнасьці ў Бэрліне 18 ліпеня праходзіла адначасова і пад бел-чырвона-белымі, і пад дзяржаўнымі сьцягамі.

У межах акцыі прайшла дэманстрацыя перад Мэмарыялам загінулым савецкім салдатам і шэсьце да бэрлінскай тэлевежы зь некалькімі прыпынкамі, падчас якіх былі мастацкія пэрформансы, чытаньні мастацкіх тэкстаў і прамовы. Удзельнікі акцыі напісалі пасланьне для землякоў у Беларусі на вялікім аркушы паперы.

На плякатах відаць надпісы: «Страх зьядае душу», «Верым. Можам. Пераможам», «Я ганаруся кожным беларусам, які кажа сыстэме НЕ». Удзельнікі намалявалі на сваіх процівірусных масках крыжы на месцы вуснаў, што сымбалізавала стан свабоды слова ў Беларусі.

Барсэлёна

У Барсэлёне беларусы правялі пікет салідарнасьці з суайчыньнікамі, бо ўлады не дазволілі рабіць паўмаштабны мітынг, праз новую ўспышку тут каранавірусу. Удзельнікі падпісалі паштоўкі палітвязьням, якія дашлюць у Беларусь.

Карціна Ксеніі Туравай "Беларускія мэтамарфозы"
Карціна Ксеніі Туравай "Беларускія мэтамарфозы"

У Барсэлёне пішуць лісты салідарнасьці беларускім палітвязьням
пачакайце

No media source currently available

0:00 0:00:29 0:00

Беласток

18 ліпеня ў Беластоку, у Польшчы, прайшоў чарговы мітынг салідарнасьці і супраць рэпрэсіяў у Беларусі.

Тэль-Авіў

Трэцяя па ліку акцыя салідарнасьці зь беларускімі палітвязьнямі прайшла на плошчы Іцхака Рабіна ў Тэль-Авіве. Усяго на акцыі было каля 100 чалавек. Сярод пратэстоўцаў былі і тыя хто пабываў у СІЗА беларускага КДБ. Чытайце па спасылцы.

Кіеў

Беларускія і ўкраінскія актывісты выйшлі ў цэнтар Кіеву на акцыю салідарнасьці зь беларусамі, якія сутыкаюцца з палітычнымі рэпрэсіямі ў розных гарадах Беларусі ў часе вулічных акцый.

На Майдан Незалежнасьці прыйшлі каля паўсотні чалавек. Да грамадзян Беларусі, якія жывуць ва Ўкраіне, далучыліся і прадстаўнікі палітычных арганізацый — Народнага Руху Ўкраіны, усеўкраінскага аб’яднаньня «Свабода», добраахвотніцкага руху «АЎН», руху салідарнасьці «Разам». Ужо традыцыйна на акцыю выйшлі пад бел-чырвона-белымі і дзяржаўнымі ўкраінскімі сьцягамі.

Дэнвэр

18 ліпеня ў сталіцы штата Каларада ў ЗША прайшла акцыя салідарнасьці з палітвязьнямі ў Беларусі і ў падтрымку дэмакратычных зьменаў. Беларусы Дэнвэру выйшлі на вуліцу з плякатамі з заклікам вызваліць беларускіх палітвязьняў і спыніць рэпрэсіі падчас прэзыдэнцкай кампаніі ў Беларусі, а таксама плякатамі «Я/Мы 97%» і «Верым! Можам! Пераможам!» з сымбалямі кампаніі аб’яднаных штабоў Сьвятланы Ціханоўскай, Віктара Бабарыкі і Валера Цапкалы.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG