Лінкі ўнівэрсальнага доступу

Трамп пазбавіў Ганконг асаблівага статусу ў дачыненьнях з ЗША


Дональд Трамп

Прэзыдэнт ЗША Дональд Трамп сваім указам пазбавіў Ганконг спэцыяльнага статусу, які забясьпечваў свабодны гандаль паміж ЗША і Ганконгам і супрацоўніцтва ў іншых галінах: фінансавай, навукова-тэхнічнай, праваахоўнай.

Аб падпісаньні адпаведнага ўказу Дональд Трамп паведаміў у аўторак падчас прэсавай канфэрэнцыі ў Белым доме:

«Ганконг пазбаўляецца асаблівых прывілеяў, асаблівых эканамічных стасункаў, забараняецца экспарт высокіх тэхналёгій, — заявіў прэзыдэнт Трамп. — З гэтага часу да Ганконгу будзе стаўленьне, як да мацерыковага Кітаю».

Паводле прэзыдэнта, гэта адказ на «рэпрэсіўныя» дзеяньні кітайскіх уладаў у дачыненьні да Ганконгу, так званага спэцыяльнага адміністрацыйнага раёну, які да 1997 году быў брытанскай калёніяй.

Нагодай для гэтай меры стала ўвядзеньне ў дзеяньне ў Ганконгу новага закону аб нацыянальнай бясьпецы, мэта якога — абмежаваньне права на пратэсты і іншыя асабістыя свабоды жыхароў тэрыторыі, гарантаваных Пэкінам у рамках кітайска-брытанскай дамовы аб перадачы Ганконгу Кітаю.

Дональд Трамп таксама падпісаў закон аб увядзеньні санкцый супраць замежных грамадзян і банкаў, якія маюць дачыненьне да парушэньня правоў і свабодаў жыхароў Ганконгу.

Пазбаўленьне Ганконгу асаблівага статусу ў дачыненьнях са Злучанымі Штатамі можа паставіць пад пытаньне ролю Ганконгу як аднаго зь вядучых сусьветных фінансавых цэнтраў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG