Лінкі ўнівэрсальнага доступу

«У Маскве лічаць, што проста вам недаклалі». Рэдактар «Эхо Москвы» адказаў Лукашэнку


Аляксей Венядзіктаў, архіўнае фота

Рэдактар «Эхо Москвы» Аляксей Венядзіктаў працягнуў завочную палеміку з Аляксандрам Лукашэнкам пра цану беларускага сувэрэнітэту.

Венядзіктаў патлумачыў, што казаў не пра тое, што паміж Лукашэнкам і Расеяй ідзе гандаль наконт цаны сувэрэнітэту Беларусі.

«А пра тое, што Расея мяркуе, што трэба прапанаваць нейкую цану, і ён прадасца. Гэта як звычайна я аддзяляю свой пункт гледжаньня ад пункту гледжаньня тых людзей, якія прымаюць рашэньне.

Сапраўды, Аляксандар Рыгоравіч, у Маскве, і вы ведаеце гэта, і вы гэта ведаеце, у Маскве шмат хто лічыць, што трэба вам прапанаваць адэкватную цану, каб вы пагадзіліся на аб’яднаньне Расеі і Беларусі. Пры гэтым, Аляксандар Рыгоравіч, цана — гэта не па кішэнях, гэта пасада, і аб’ём паўнамоцтваў.

І сапраўды вам было прапанавана ўзначаліць саюзны парлямэнт, і вы правільна сказалі ў інтэрвію зноў жа мне, што гэта нейкая фігня. Таму лічыце, што вы пазванілі, і я перадам.

Але я лічу, што па-ранейшаму вельмі шмат якія людзі ў Маскве, у Крамлі і Белым доме лічаць, што проста вам недаклалі», — сказаў Венядзіктаў.

Штуршок да абмену выказваньнямі паміж Лукашэнкам і Венядзіктавым дало інтэрвію рэдактара «Эхо Москвы» ўкраінскаму журналісту Дзьмітрыю Гардону 6 ліпеня.

«Ці ўстоіць Лукашэнка, ці не — гэта пытаньне цаны. Важна, што прапануюць. Бо ў яго ёсьць тавар, але дайце за яго добрую цану», — сказаў Аляксей Венядзіктаў Дзьмітрыю Гардону.

Праз тры дні Лукашэнка адказаў Венядзіктаву разважаньнямі пра бясцэннасьць сувэрэнітэту і незалежнасьці Беларусі. «Няма той цаны, якую яны мне могуць заплаціць, каб я пайшоў на іхныя ўмовы, — заявіў Аляксандр Лукашэнка на сустрэчы з журналістамі дзяржаўных медый 9 ліпеня. — У труне кішэняў няма». «Сувэрэнітэт і незалежнасьць не прадаюцца», — падсумаваў Лукашэнка. Ён таксама заявіў, што ніколі не пагодзіцца на пост у Расеі, калі для гэтага трэба будзе далучыць Беларусь. Словы Аляксандра Лукашэнкі перадаў канал АНТ.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG