Лінкі ўнівэрсальнага доступу

Менскі сьвятар рушыў у пілігрымку ў Будслаў на монаколе. ФОТА


Фота Tut.by
Фота Tut.by

Пробашч Чырвонага касьцёла ў Менску Ўладзіслаў Завальнюк 29 чэрвеня выправіўся ў пілігрымку ў Будслаў. Ён плянуе праехаць 132 км па Беларусі на монаколе і 2 ліпеня прыбыць на сьвята Будслаўскай іконы Божай Маці, паведамляе Tut.by.

70-гадовы сьвятар будзе праяжджаць па 35-40 км у суткі ў сваім касьцёльным уборы. Пілігрымка заплянаваная выключна толькі з вадой, бязь ежы. Некалькі парафіян Чырвонага касьцёла будуць суправаджаць ксяндза на машыне. На борце аўтамабіля ўрывак з малітвы: «Ад пажару, голаду, вайны і віруснай заразы беражы нас, Божа».

«Мне вельмі не хацелася адмаўляцца ад пілігрымак. Трохі падумаў і вырашыў, што можна знайсьці бясьпечны варыянт для праходжаньня шляху», — тлумачыць сьвятар выбар такога віду транспарту: у гэтым годзе традыцыйнае паломніцтва адмянілі з прычыны пандэміі каранавірусу.

Ксяндза-каноніка праводзілі ў пілігрымку парафіяне касьцёла і 29 менчукоў на монаколах, якія правялі яго да выезду на трасу.

Менскі інструктар Ігар Сушчанка, які трэнаваў і кансультаваў сьвятара перад падарожжам, на працягу паломніцтва будзе на сувязі з групай суправаджэньня і ксяндзом — дапамагаць з тэхнічнымі пытаньнямі, калі такія паўстануць.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG