Не выдаваць Турэччыне 27-гадовага курда Хіджры Мамаша заклікала беларускія ўлады праваабарончая арганізацыя Human Constanta. Паводле яе, 24 чэрвеня Вярхоўны суд пастанавіў выдаць Мамаша Турэччыне. Рашэньне абскарджаньню не падлягае. 1 ліпеня яго павінны адправіць на радзіму.
«Турэцкага курда Хіджры Мамаша адправяць на радзіму ў Турэччыну. Зь вялікай імавернасьцю там яго чакаюць катаваньні», — гаворыцца ў заяве арганізацыі.
Хіджры Мамаш абвінавачаны ў замаху на адзінства і тэрытарыяльную цэласнасьць дзяржавы. Курд настойвае, што гэтае абвінавачаньне палітычна матываванае і яго перасьледуюць за ўдзел у мірных акцыях.
На думку Human Constanta, выдачай Мамаша Беларусь «парушыць ня толькі міжнародныя дамоўленасьці, але і сваё ўласнае заканадаўства».
Адвакат Хіджры Мамаша Арцём Калоша раней паведаміў БелаПАН, што курд уцёк з Турэччыны з прычыны пагрозы перасьледу ў Ірак, адтуль прыехаў у Ерэван. Ён набыў новыя дакумэнты, па якіх купіў квіток на самалёт з Ерэвана да Бялграда празь Менск, аднак у беларускай сталіцы 6 ліпеня 2019 году быў арыштаваны праз абвінавачаньне ў падробцы пашпарта. З тых часоў знаходзіцца пад вартай у сьледчым ізалятары. Яго плянавалі дэпартаваць зь Беларусі і забараніць уезд на пяць гадоў.
Мамаш падаў заяву аб міжнароднай абароне ў Беларусі, але дэпартамэнт грамадзянства і міграцыі 5 лютага 2020 году яму адмовіў. Суд Цэнтральнага раёну Менска 3 красавіка пакінуў рашэньне ў сіле. 23 красавіка намесьнік генпракурора Аляксей Стук задаволіў просьбу Міністэрства юстыцыі Турэччыны, дазволіўшы выдачу Хіджры Мамаша для прыцягненьня да адказнасьці паводле арт. 302/1 Крымінальнага кодэксу Турэччыны (замах на адзінства і тэрытарыяльную цэласнасьць дзяржавы).
1 чэрвеня Менскі гарадзкі суд пакінуў у сіле рашэньне Генэральнай пракуратуры Беларусі аб выдачы Турэччыне Мамаша, а яго скаргу - без задавальненьня. Пасьля гэтага курд зьвярнуўся ў Вярхоўны суд.
У канцы траўня Камітэт правоў чалавека ААН вынес рашэньне аб прымяненьні часовых захадаў да Хіджры Мамаша, запатрабаваўшы ад беларускага ўраду прыпыніць перадачу курда да разгляду скаргі па сутнасьці ў камітэце.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў