Лінкі ўнівэрсальнага доступу

У Менску каля крамы Symbal.by затрымалі пакупнікоў

абноўлена

Увечары 23 чэрвеня пасьля паведамленьня пра закрыцьцё крамы Symbal.by каля яе ўтварылася чарга з 50 пакупнікоў. Сузаснавальнік крамы Мікіта Броўка паведаміў Свабодзе пра затрыманьне 20 чалавек.​

Пасьля абвесткі пра закрыцьцё крамы, ля яе ўтварылася чарга з 50 пакупнікоў. А 19:40 да крамы падʼехаў аўтазак, удзельнікі чаргі і супрацоўнікі крамы, якія вялі онлайн-трансьляцыю разьехаліся. Сузаснавальнік Symbal.by Мікіта Броўка ў жывым эфіры паведаміў пра затрыманьні ўдзельнікаў чаргі і прыпыніў трансьляцыю. Паводле Броўкі да крамы падʼязжалі два аўтазакі, у іх зьмясьцілі каля 20 чалавек. Сярод затрыманых:

  • Аляксандар Кузняцоў, студэнт, які наладзіў выпуск дэталяў для апаратаў вэнтыляцыі лёгкіх на 3D-прынтары;
  • Ільля Дземчанка;
  • Аляксандар Паплаўскагі;
  • няштатны фотакарэспандэнт БелаПАН Андрэй Шаўлюга (вызвалілі а 22:14);
  • Аляксандар Райчонак.

«Выяжджаў аўтамабіль, а людзі, якая стаялі побач з крамай, не давалі яму праехаць, – паведаміла Радыё Свабода прадстаўніца МУС Натальля Ганусевіч. — У мэтах спыненьня супрацьпраўных дзеяньняў, якія выразіліся ў блякаваньні аўтамабіля, выехаў нарад міліцыі. Некаторыя асобы дастаўленыя для разьбіральніцтва».

Падчас жывой трансьляцыі Symbal.by паміж кіроўцам аўтамабіля, якія выяжджаў з двара і людзьмі ў чарзе адбыўся канфлікт. Паводле сузаснавальніка крамы Паўла Белавуса, за стырном машыны быў мясцовы жыхар.

У той жа час з розных відэа з сацыяльных сетак відаць, што супрацоўнікі АМАП затрымлівалі людзей з чаргі, якія не прысутнічалі падчас канфлікту. АМАП таксама здаганяў людзей у дварах і зьмяшчаў у аўтазак. Сьведкі кажуць пра жорсткія затрыманьні.

Бізнэсовец Павал Белавус абвясьціў пра закрыцьцё афлайн-крамы Symbal.by з 29 чэрвеня. Раней прыпыніла сваю працу онлайн-крама.​Паводле Белавуса, праверкі супраць крамы не спыняюцца праверкі, а толькі павялічваюцца.

12 чэрвеня ў Менску супрацоўнікі ДАІ спынілі кур’ера Максіма Блізьнюковіча, які вёз у краму 419 маек з надпісам «Псіхо3%». Паводле Паўла Белавуса, такія майкі — дызайнэрская прадукцыя кампаніі «Сымбаль Бай». Усе дакумэнты на гэтыя тавары спраўныя, забралі тавар цалкам незаконна, мяркуе Белавус.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG