Лінкі ўнівэрсальнага доступу

Прэм’ер Канады выступіў супраць удзелу Расеі ў G7


Джастын Трудо
Джастын Трудо

Прэм’ер-міністар Канады Джастын Трудо, выступаючы ў Атаве на прэс-канфэрэнцыі, адказаў на пытаньне пра яго стаўленьне да ідэі прэзыдэнта ЗША Дональда Трампа запрасіць Расею ўдзельнічаць у чарговай сустрэчы «Групы сямі».

«Расея была выключана з G8 пасьля ўварваньня ў Крым, і яна працягвае грэбліва ставіцца да міжнародных правілаў і нормаў, таму застаецца па-за групай G7 і будзе заставацца па-за гэтай групай», — заявіў канадзкі прэм’ер.

Супраць прапановы Трампа таксама выступіла Вялікая Брытанія, дапусьціўшы магчымасьць запрашэньня Расеі ў якасьці госьця.

Прэзыдэнт ЗША Дональд Трамп заявіў пра перанос саміту G7 з чэрвеня на верасень пасьля таго, як канцлерка Нямеччыны Ангела Меркель адмовілася ад асабістага ўдзелу ў ім у сувязі з пандэміяй каранавіруснай інфэкцыі.

Прэзыдэнт ЗША, аднак, патлумачыў сваё рашэньне аб пераносе саміту не каранавірусам, а тым, што G7 у цяперашнім фармаце, паводле Трампа, уяўляе сабой «вельмі састарэлую групу краін», якая «не адлюстроўвае таго, што адбываецца ў сьвеце».

На думку Трампа, удзел у саміце, акрамя іх, павінны браць Аўстралія, Расея, Паўднёвая Карэя і Індыя.

У панядзелак Дональд Трамп і Ўладзімір Пуцін правялі тэлефонную размову, падчас якой, як паведаміла прэс-служба Белага дома, двое лідэраў абмеркавалі барацьбу з пандэміяй каранавірусу і намаганьні для аднаўленьня эканамічнай дзейнасьці ў сьвеце.

Прэзыдэнт Трамп адзначыў, што ЗША прыкладаюць усе намаганьні, каб паклапаціцца пра сваіх грамадзян і дапамагчы краінам, якія жывуць у нястачы. У ліку іншага, Вашынгтон перадаў Расеі 200 апаратаў штучнай вэнтыляцыі лёгкіх.

Амэрыканскі лідэр таксама падкрэсьліў патрэбу ў эфэктыўным кантролі над узбраеньнямі. Прэзыдэнт ЗША расказаў расейскаму калегу пра ідэю запрасіць Расею і шэраг іншых краін на саміт «Групы сямі».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG