Суд Партызанскага раёну Менску прызнаў двух чалавек вінаватымі ў камэрцыйным шпіянажы і асудзіў на 2 гады пазбаўленьня волі з адтэрміноўкай на 2 гады, піша Генэральная пракуратура.
Цягам двух гадоў іхныя паводзіны будуць кантраляваць, але за краты не пасадзяць, калі асуджаныя ня будуць парушаць парадку.
Як выявіла пракуратура, ад кастрычніка 2015 году па люты 2018-га падсудныя атрымлівалі несанкцыянаваны доступ да базы зьвестак «Белмытсэрвісу» — спачатку выкарыстоўвалі логін і пароль трэцяй асобы, затым стварылі і выкарыстоўвалі кампутарныя праграмы для капіяваньня інфармацыі з базы.
З гэтай базы яны бралі зьвесткі аб мытных дэклярацыях кампаніяў «у сфэры замежнаэканамічнай дзейнасьці», перадавалі іх прадстаўніку кампаніі ViM Inion, ацэньвалі рызыкі дамоўных адносінаў, вызначалі таваразварот кампаніяў — і пераваблівалі буйных кліентаў. Прадстаўнікі ViM Union тэлефанавалі на прадпрыемствы і прапаноўвалі свае паслугі на больш выгадных умовах, скарыстаўшы зьвесткі, якія былі камэрцыйнай тайнай.
Абвінавачаныя М. і С. прызналі сваю віну, прысуд набыў законную моц.
У студзені быў абвешчаны іншы прысуд у справе аб крадзяжы закрытых зьвестак з базы «Белмытсэрвісу»: намесьнік дырэктара «МаналітПрамінвест» у інфармацыйных тэхналёгіях Канстанцін Мароз асуджаны на 5 гадоў пазбаўленьня волі з адтэрміноўкай пакараньня на 3 гады, супрацоўнік фірмы Сяргей Суравіцкі — на 4 гады зьняволеньня з адтэрміноўкай таксама на 3 гады.
Паводле сьледзтва, зь Сяргеем Суравіцкім і Канстанцінам Марозам быў зьвязаны трэці фігурант, Дзьмітры Дашук, які ў 2018 годзе затрымалі ва Ўкраіне на запыт беларускіх праваахоўнікаў. Справа Дашука выдзеленая ў асобную вытворчасьць. Свабода даведалася, што ва Ўкраіне Дашуку ўвосень 2019 году хатні арышт замянілі на падпіску аб нявыезьдзе.
Страты, нанесеныя праз камэрцыйны шпіянаж арганізацыі «Белмытсэрвіс», сьледзтва тады ацэньвала больш як у 600 тысяч рублёў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў