Лінкі ўнівэрсальнага доступу

Пракурор просіць пакараць абвінавачанага ў забойстве жонкі сьвятара 25 гадамі зьняволеньня


Справа — абвінавачаны Віктар

У Гомельскім абласным судзе на слуханьнях па справе аб забойстве жонкі сьвятара пачаліся дэбаты бакоў.

Злачынства адбылося ў кастрычніку 2019 году. Абвінавачанаму пагражае сьмяротнае пакараньне.

Першапачаткова праз падазрэньне ў забойстве 42-гадовай Тацьцяны быў затрыманы яе муж, праваслаўны сьвятар. Але пазьней падазраваным прызналі 23-гадовага Віктара.

Пазыцыя абвінавачваньня

25 траўня прадстаўніца дзяржаўнага абвінавачаньня прасіла суд прызначыць Віктару пакараньне — 25 гадоў пазбаўленьня волі. Яна заявіла, што віна 23-гадовага Віктара даказана ў судзе.

Сьмерць Тацьцяны Агіевіч наступіла ад масіўнай страты крыві — ёй было нанесена ня менш за 16 удараў нажом і 42 — «тупым прадметам», дакладней — рукамі і нагамі.

Паводле прадстаўніцы пракуратуры, тое, што Віктар толькі часткова прызнае віну, расцэньваецца як спроба пазьбегнуць адказнасьці.

Першапачаткова, пасьля затрыманьня міліцыяй, вясковец прызнаў сваю віну і падрабязна расказаў пра забойства. Паводле першапачатковых паказаньняў, Віктар працаваў на будоўлі царквы.

У дзень забойства, 1 красавіка, ён пасварыўся са сваёй дзяўчынай зь іншай вёскі, вырашыў «пазычыць» аўтамабіль у сьвятара і зьезьдзіць да сяброўкі. Калі ішоў да хаты сьвятара, узяў з сабой нож, бо «разумеў, што добраахвотна матушка аўтамабіля ня дасьць». Сапраўды, Тацьцяна не дала ключоў ад аўтамабіля, і Віктар напаў на яе з нажом.

Пазьней ён зьмяніць паказаньні і сьведчыў што нож з сабой прыхапіў не для таго, каб забіваць, а каб падарыць свайму тату. Віктар стаў казаць, што ўдарыў нажом Тацьцяну, але калі пайшоў з хаты, яна была жывая і сядзела на канапе.

Сьледзтва не знайшло пацьвярджэньня гэтаму — на канапе не было сьлядоў крыві. Віктар забіў Тацьцяну, забраў з хаты грошы — 20 даляраў і тысячу расейскіх рублёў, мабільны тэлефон «Соні», сеў за стырно чужога аўто і паехаў катацца. Тысячу расейскіх рублёў ён «абмяняў» на тры бутэлькі гарэлкі, якія выпіў са сваім бацькам. Пасьля гэтага паехаў зноў паехаў катацца. Потым лёг спаць у сястры.

Калі даведаўся, што яго шукае міліцыя, пайшоў хавацца ў лес.

Прадстаўніца пракуратуры прасіла задаволіць грамадзянскія пазовы сьвятара і яго сына і задаволіць кампэнсацыю маральнай шкоды ў памеры 150 тысяч рублёў кожнаму.

Што кажуць сваякі забітай

Сьвятар Георгі Агіевіч, як і ягоны сын, прызнаныя пацярпелымі ў справе. У судовых спрэчках сьвятар выказаўся, што лічыць пакараньне ў 25 гадоў «лёгкім».

«Яму — толькі пажыцьцёвае, да людзей такога нельга пускаць. Я бы даў яму больш... На ўсё Воля Божая, прабачце», — зазначыў Георгі.

Сын сьвятара таксама ня згодны з прапанаваным тэрмінам у 25 гадоў, і лічыць, што варта даць пажыцьцёвае. Адвакатка выказалася, што пракурор просіць надта суровае пакараньне для яе падабароннага. Яна зазначыла, што Віктар мае станоўчыя характарыстыкі, што ён раскаяўся, прызнаўся ў злачынстве — часткова, бо запэўнівае, што ня меў намеру забіваць і не наносіў так шмат удараў.

Айцец Георгі і ягоная жонка Тацьцяна нарадзіліся ў вёсцы Рубель Столінскага раёну. Яны былі 24 гады ў шлюбе, мелі дваіх дзяцей. Цяпер сын і дачка дарослыя, жывуць у Астраўцы і Менску.

Больш за 10 гадоў айцец Георгі служыў у царкве пасёлку Азарычы (Калінкавіцкі раён). 2-га кастрычніка ў сваім доме была знойдзена забітай Тацьцяна. Праваахоўныя органы затрымалі яе мужа-сьвятара. Сьледчы камітэт паведаміў, што 47-гадовы мужчына затрыманы ў стане алькагольнага ап’яненьня. 3-га кастрычніка стала вядома, што праваслаўнага сьвятара адпусьцілі з ізалятара часовага ўтрыманьня.

Сярод жыхароў Азарычаў цяпер ходзіць «вэрсія», што бацюшку «нешта падсыпалі», што тлумачыць ягоны неадэкватны стан і тое, што ён доўга ня мог апрытомнець.

Абвіанвачаны Віктар жыў у вёсцы Ліпаў Калінкавіцкага раёну, дапамагаў бацюшку будаваць новую царкву.

Гэтая публікацыя падрыхтаваная з выкарыстаньнем інфармацыі БелаПАН.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG