Лінкі ўнівэрсальнага доступу

Палітвязьня Мікіту Емяльянава накіруюць у «крытую турму», магчыма ў Магілёве


Мікіта Емяльянаў у судзе, архіўнае фота

Анархіста Мікіту Емяльянава, які адбывае пакараньне ў Бабруйскай калёніі, на пачатку чэрвеня зьбіраюцца накіраваць для далейшага адбыцьця пакараньня ў крытую турму. Пра гэта палітвязень паведаміў у лісьце да сваёй маці Анастасіі Емяльянавай.

«Вось перада мной апошні ліст Мікіты. Піша, што цяпер знаходзіцца ў ПКТ (гэта памяшканьне камэрнага тыпу), дзе прабудзе да 7 чэрвеня, а тады яго перавязуць у крытую турму. Ён думае, што, хутчэй за ўсё, у Магілёў. А 21 траўня яго павядуць на камісію, якая будзе вырашаць зьмену для яго рэжыму ўтрыманьня. Цяпер у яго ўзмоцнены, а ў крытай турме будзе строгі рэжым, хутчэй за ўсё, так. Вынікі мне невядомыя», — сказала Анастасія Емяльянава.

У Бабруйскай калёніі дзяжурны пацьвердзіў, што пры пераводзе зьняволенага з калёніі ў турму рэжым утрыманьня мяняецца на больш строгі, але зьвесткі пра вязьня Мікіту Емяльянава ўдакладніць ня змог. «Да мяне такую інфармацыю не даводзяць. Ягоным сваякам ён сам напіша», — сказаў дзяжурны.

Палітвязьню Мікіту Емяльянаву 20 гадоў. З красавіка ён адбывае пакараньне ў Бабруйскай калёніі. Паводле маці вязьня, за адмову падпісваць згоду на перавыхаваньне і супрацоўніцтва з адміністрацыяй Мікіта Емяльянаў на 5 дзён трапіў у карцэр, потым яшчэ месяц быў у карантыне, цяпер ён у ПКТ. Маці Мікіта Емяльянаў піша, што зь ім усё нармальна, на здароўе ня скардзіцца.

«Але гэта ён мне так піша, каб мяне супакоіць, а сябрам — іншае. Што ў яго трывалыя болі ў сьпіне, бо ў карцэры, дзе ён часта сядзіць, на ложку няма матрацаў. Таму сьпіна і баліць», — кажа Анастасія Емяльянава.

Актывіст анархісцкага руху Зьміцер Паліенка лістуецца зь Мікітам Емяльянавым. Зьміцер Паліенка кажа, што ня ўсе лісты, якія ён дасылае Мікіту, даходзяць да адрасата, гэтаксама і ад Мікіты ён атрымлівае ня ўсе лісты. Зьміцер пацьвердзіў, што Мікіту Емяльянава зьбіраюцца накіраваць у крытую турму.

«Мне ён пра гэта таксама напісаў. Ведаю, што 21 траўня яго павядуць на камісію, якая будзе вырашаць, ці накіраваць яго ў турму з адпаведнай зьменай рэжыму», — сказаў Зьміцер Паліенка. Былы палітвязень пацьвердзіў таксама, што сябар пісаў яму пра трывалыя болі ў сьпіне пасьля сутак, праведзеных у карцэры.

Мікіта Емяльянаў асуджаны на 4 гады за тое, што летась кінуў «кактэйль Молатава» ў СІЗА на вуліцы Валадарскага і лямпачку з фарбай у будынак Менскага гарадзкога суду. Мікіта Емяльянаў прызнаваў, што зрабіў гэта на знак пратэсту супраць рэпрэсій адносна актывістаў анархісцкага руху.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Ягор Марціновіч

Самае папулярнае

XS
SM
MD
LG