У Казахстане рэжым надзвычайнага становішча, уведзены праз эпідэмію каранавірусу, будзе прызнаны форс-мажорам пры звароце ў суд прадпрымальнікаў. Пра гэта заявіў прэзыдэнт краіны Касым Такаеў.
Каранавірус у Беларусі і ў сьвеце. Як разьвіваюцца падзеі >>
«З мэтай недапушчэньня ціску з боку нядобрасумленных крэдытораў даручаю прыпыніць распачынаньне працэдуры банкруцтва ў адносінах да юрыдычных асоб і індывідуальных прадпрымальнікаў да 1 кастрычніка бягучага году», — распарадзіўся кіраўнік Казахстану.
Рэжым надзвычайнага становішча ў Казахстане быў уведзены 16 сакавіка ў сувязі з пандэміяй каранавірусу. 11 траўня ён завяршыўся, але на тэрыторыі краіны захоўваецца карантынны рэжым. Улады абяцаюць паступова здымаць абмежаваньні, калі прырост захворваньня на COVID-19 будзе ня большы, чым 7% на працягу тыдня.
Паводле афіцыйных зьвестак, у Казахстане пацьверджана 5138 выпадкаў заражэньня каранавіруснай інфэкцыяй. Памер 31 чалавек, 1941 выздаравеў.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
