Лінкі ўнівэрсальнага доступу

Звольненаму пасьля інтэрвію кіраўніку віцебскага шпіталя прапанавалі новую працу


Сяргей Лазар, архіўнае фота
Сяргей Лазар, архіўнае фота

Былы галоўны доктар віцебскай бальніцы хуткай мэдыцынскай дапамогі (БХМД) Сяргей Лазар, якога звольнілі 30 красавіка, застанецца ў мэдыцыне: яму прапанавалі некалькі варыянтаў працы, у тым ліку кіраўніком, паведаміў Tut.by кіраўнік Галоўнага ўпраўленьня аховы здароўя Віцебскага аблвыканкаму Міхаіл Вішнявецкі.

Таксама Вішнявецкі дадаў, што звальненьне Лазара не зьвязана з публікацыяй Tut.by.

«Ваш рэпартаж з БХМД дакладна ня мае ніякага дачыненьня да звальненьня галоўнага доктара. Працоўныя адносіны зь ім спыненыя па згодзе бакоў. Сяргею Віктаравічу прапанавана некалькі варыянтаў працы. Ён выбірае, куды пойдзе. Я не зьбіраюся сьпісваць яго як кіраўніка. Іншае пытаньне, ці захоча ён быць кіраўніком, ці захоча працаваць доктарам? Гэта рашэньне прыме ён сам. За ім цяпер — права і слова. Калі ён падумае, дзе будзе працаваць, і вырашыць, то паведаміць пра гэта», — сказаў Вішнявецкі.

У Віцебску 30 красавіка звольнілі з пасады галоўнага доктара гарадзкой клінічнай лякарні хуткай мэдычнай дапамогі, дэпутата гарсавету Сяргея Лазара. Некаторыя лічаць, што звальненьне галоўнага доктара зьвязана з публікацыяй на найбуйнейшым інтэрнэт-партале Беларусі, у якой расказана аб працы лекараў і мэдсёстраў у «бруднай зоне» шпіталя хуткай дапамогі падчас эпідэміі каранавірусу.

У Міністэрстве аховы здароўя Tut.by сказалі, што разрыў працоўных адносін з гэтым не зьвязаны. Сам Сяргей Лазар адмаўляецца камэнтаваць звальненьне.

55-гадовы Сяргей Лазар узначальваў віцебскую лякарню хуткай дапамогі з 2015 году. Абавязкі галоўнага доктара цяпер выконвае былы намесьнік Лазара Аляксандар Віньнікаў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG