Гішпанія 30 красавіка зафіксавала самую нізкую сутачную сьмяротнасьць ад каранавірусу за апошнія шэсьць тыдняў.
Пандэмія каранавірусу ў Беларусі і ў сьвеце. Як разьвіваюцца падзеі
Колькасьць выпадкаў сьмерці, зьвязаных з каранавірусам, за апошнія суткі склала 268 — гэта самая нізкая лічба з 20 сакавіка, паводле паведамленьня Міністэрства аховы здароўя краіны.
Пра гэта паведамляе Reuters, адзначаючы пры тым, што змаганьне з пандэміяй каранавірусу адбываецца коштам значнага скарачэньня эканомікі Гішпаніі.
Паводле папярэдніх зьвестак, эканоміка Гішпаніі скарацілася на 5,2% у першым квартале гэтага году ў параўнаньні з папярэднім пэрыядам.
У Гішпаніі адзін з найгоршых у сьвеце асяродкаў каранавірусу — на сёньняшні дзень у краіне зафіксавалі 237 тысяч выпадкаў каранавіруснай інфэкцыі і больш за 24 тысячы сьмерцяў. У колькасьці інфікаваных Гішпанія выйшла на другое месца, за ЗША.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
