Заражэньне каранавіруснай інфэкцыяй дыягнаставалі ў 28 будаўнікоў інфэкцыйнага аддзяленьня вайсковага шпіталя на Камчатцы, сярод іх — грамадзяне Беларусі, паведамляе ТАСС са спасылкай на Мінздароўя Камчацкага краю.
«Новым ачагом распаўсюджваньня інфэкцыі» назвалі ў Мінздароўя рэгіёну будаўнічую пляцоўку інфэкцыйнага аддзяленьня вайсковага шпіталя ў Петрапаўлаўску-Камчацкім, дзе працавалі будаўнікі з Расеі і блізкага замежжа. 22 красавіка дыягназ пацьвердзіўся ў 28 рабочых.
Паводле крыніцы ТАСС у Мінздароўя, інфармацыю якой пацьвярджаюць мясцовыя СМІ, сярод хворых, акрамя расейцаў, ёсьць і грамадзяне Беларусі. Колькі іх, крыніца не ўдакладніла.
З 1 красавіка на паўвостраве дзейнічае рэжым поўнай самаізаляцыі. Цяпер на Камчатцы 91 афіцыйна пацьверджаны выпадак заражэньня каранавірусам, 4 чалавекі паправіліся.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
