Лінкі ўнівэрсальнага доступу

Палітвязьня Жамчужнага перавялі зь СІЗА назад у Горацкую калёнію


Міхаіл Жамчужны да зьняволеньня і ў няволі.
Міхаіл Жамчужны да зьняволеньня і ў няволі.

Віцебскія праваабаронцы перасталі атрымліваць лісты ад палітвязьня Міхаіла Жамчужнага. Як высьветлілася, яго перавялі ў Горацкую калёнію. Праваабарончы цэнтар «Вясна» расказвае, што праваабаронца Наста Лойка атрымала ад яго ліст, датаваны 1 красавіка.

Да таго лістоў ад Жамчужнага не было больш за два тыдні. Раней у Віцебску Жамчужнаму адмовілі ў атрыманьні пасылак і спатканьнях.

Жамчужнага ўтрымлівалі ў СІЗА ў Віцебску празь «недарасьсьледаваную» справу аб крадзяжы ягонай маёмасьці. Гэтую справу распачалі ў лютым 2011 году, спынілі ў траўні 2016-га праз сканчэньне тэрміну даўнасьці.

Жамчужны зьвярнуўся ў сувязі з гэтым у пракуратуру Віцебскай вобласьці — пракурор скасаваў спыненьне справы і вярнуў яе сьледчым. Які вынік разгляду справы, пакуль невядома.

Хто такі Жамчужны?

  • Выкладаў у Віцебскім тэхналягічным унівэрсытэце. Кіраваў дасьледчай лябараторыяй, якая працавала над атрыманьнем вадароду для выкарыстаньня ў прамысловасьці.
  • У 2008 годзе быў асуджаны за эканамічныя злоўжываньні на 4 гады. Вырак абскарджваў, але марна.
  • У 2012 годзе па вызваленьні заняўся праваабарончай дзейнасьцю, стаў адным з заснавальнікаў праваабарончай арганізацыі «Плятформа інавэйшн».
  • У 2015 годзе асуджаны Віцебскім абласным судом: быў прызнаны вінаватым у падбухторваньні да наўмыснага выдаваньня зьвестак, якія складаюць службовую тайну, у незаконным набыцьці і збыце спэцыяльнага тэхнічнага сродку, прызначанага для сакрэтнага атрыманьня інфармацыі, і ў даваньні хабару.
  • Быў асуджаны на 6 гадоў пазбаўленьня волі ў калёніі строгага рэжыму. Судовая калегія крымінальных спраў Вярхоўнага суду прызначыла яму 6,5 года пазбаўленьня волі. Справу разглядалі суды ў закрытым рэжыме. Сваёй віны не прызнаў.
  • Адбываў пакараньне ў калёніях у Навасядах і Івацэвічах. Больш як два гады, да апошняга часу, знаходзіўся ў Горацкай папраўчай калёніі № 19.
  • Адмовіўся пераходзіць у атрад зь вязьнямі зь нізкім статусам. За гэта адбыў у карцэры больш за 500 дзён.
  • Заяўляў пра правакацыі супраць яго з боку адміністрацыі калёніі і працягваў абскарджваць вынесены яму прысуд.
  • Праваабаронцы прызналі яго палітвязьнем. Яны дамагаюцца, каб прысуд быў адменены і каб справу перагледзелі ў адкрытым судовым паседжаньні.
  • На свабоду мае выйсьці ў лютым 2021 году.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG