ЗША пачалі выводзіць войскі з Аўганістану, прыступіўшы да выкананьня пагадненьня з рухам Талібан.
Пра гэта паведамляе «Голас Амэрыкі» са спасылкай на амэрыканскіх вайскоўцаў.
Пагадненьне паміж ЗША і Талібанам, падпісанае 29 лютага, падавалася як спроба Вашынгтону пакласьці канец 18-гадовай вайне ў Аўганістане.
Прадстаўнік амэрыканскіх вайскоўцаў у Аўганістане Соні Легет заявіў у аўторак, што пачалося «скарачэньне сіл, якое базуецца на пэўных умовах, да 8600 чалавек на працягу 135 дзён».
Цяпер у Аўганістане знаходзяцца каля 13 тысяч амэрыканскіх вайскоўцаў. Зь іх 8 тысяч займаюцца навучаньнем і кансультаваньнем аўганскіх нацыянальных сіл бясьпекі.
Яшчэ прыкладна 5 тысяч чалавек бяруць удзел у антытэрарыстычных апэрацыях і аказваюць ваенную падтрымку аўганскай арміі, калі паступаюць адпаведныя просьбы.