Андрэй Юркоў з Дрыбінскага раёну Магілёўскай вобласьці выказаў нэгатыўнае стаўленьне да нацысцкага рэжыму, паставіўшы пад допісам у «Одноклассниках» смайлік «сумую». За гэта яго аштрафавалі.
Дрыбінскі раённы суд скасаваў сваё ж рашэньне аб накладаньні штрафу за распаўсюджваньне экстрымісцкіх матэрыялаў на актывіста руху «За Свабоду», былога кандыдата ў дэпутаты Палаты прадстаўнікоў Андрэя Юркова.
Ён паставіў смайлік «сумую» пад допісам з выяваю нацыскай сымболікі ў «Одноклассниках». За гэта судзьдзя Барыс Пігаль пакараў актывіста 255 рублямі штрафу (10 базавых велічыняў).
Паводле Юркова, 25 лютага судзьдзя Людміла Новікава палічыла, што ягоная рэакцыя на публікацыю ў сацыяльнай сетцы і складзены пратакол аб адміністрацыйным правапарушэньні зьявіліся раней, чым Кастрычніцкі раённы суд Віцебска прызнаў выяву нацысцкай сымболікі экстрымісцкай. Рэшэньне віцебскага суду ўступіла ў сілу 27 лістапада 2019 году. Пратакол аформілі на Юркова 19 лістапада.
Першы раз справу супраць актывіста Дрыбінскі суд разглядаў 23 сьнежня 2019 году. 6 студзеня 2020-га Магілёўскі абласны суд палічыў, што яна не разгледжаная належным чынам. Не была дадзена ацэнка кантэксту публікацыі, асобы аўтара і наступстваў зьяўленьня выявы ў сацыяльнай сетцы.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў