Міністар унутраных справаў Нямеччыны Горст Зээгофэр назваў забойства 11 чалавек у горадзе Ганаў 19 лютага «расісцкія матываваным тэрарыстычным актам».
На прэс-канфэрэнцыі ў Бэрліне 21 лютага Зээгофэр таксама сказаў, што пагроза з боку правага экстрэмізму і антысэмітызму ў краіне зьяўляецца «вельмі высокай».
Урад Нямеччыны выплаціць кампэнсацыі сем’ям ахвяраў страляніны ў Ганаў, паведамляе Deutsche Welle. Сужэнцам, дзецям і бацькам ахвяраў прадугледжаныя выплаты ў памеры 30 тысяч эўраў, братам і сёстрам — 15 тысяч эўраў.
19 лютага 43-гадовы Тобіяс Р. застрэліў дзевяць чалавек у двух кальянавых барах гораду Ганаў, што ў 20 кілямэтрах ад Франкфурту-на-Майне. Злачынца вярнуўся дадому, дзе, як мяркуюць сьледчыя, застрэліў сваю маці і скончыў жыцьцё самагубствам. Сама менш пяць чалавек атрымалі ў выніку страляніны цяжкія раненьні. Сярод ахвяраў злачынца былі людзі з міграцыйнымі каранямі, у тым ліку грамадзяне Балгарыі, Турцыі, Румыніі, Босьніі і Герцагавіны, Аўганістану.