Лінкі ўнівэрсальнага доступу

У Мюнхэне на канфэрэнцыі аб бясьпецы сустрэнуцца сусьветныя лідэры. Ад Беларусі будзе Макей


Міністар замежных справаў Беларусі Ўладзімер Макей

Міністар замежных спраў Беларусі Ўладзімер Макей 14-16 лютага возьме ўдзел у Мюнхэнскай канфэрэнцыі ў пытаньнях бясьпекі, паведаміў БелаПАН прэс-сакратар МЗС Анатоль Глаз.

«Міністар узначаліць беларускую дэлегацыю. Акрамя ўдзелу ў самой канфэрэнцыі, заплянаваны шэраг двухбаковых сустрэч і перамоваў», — адзначыў ён.

Свой удзел у імпрэзе пацьвердзілі кіраўнікі краін і ўрадаў 35 краін сьвету. Сярод іх прэзыдэнт Францыі Эманюэль Макрон, прэзыдэнт Украіны Ўладзімір Зяленскі, прэм’ер-міністар Канады Джастын Трудо.

Гэтаксама ў сьпісе топ-гасьцей Дзяржсакратар ЗША Майк Пампэо, Генэральны сакратар НАТО Енс Столтэнбэрг, міністры замежных спраў Кітаю, Ірану ды іншых дзяржаў.

Летась на аналягічную канфэрэнцыю быў запрошаны Аляксандар Лукашэнка, аднак у апошні момант візыт у Нямеччыну быў скасаваны з прычыны сустрэчы з расейскім прэзыдэнтам Уладзімірам Пуціным.

«У сувязі зь неабходнасьцю вырашэньня важных пытаньняў беларуска-расейскіх адносінах з прэзыдэнтам Расейскай Фэдэрацыі ўдзел у Мюнхэнскай канфэрэнцыі не ўяўляецца магчымым», — гаварылася тады ў камэнтары МЗС Беларусі.

Ці дасылалася запрашэньне Лукашэнку гэтым разам, у ведамстве не ўдакладняюць. Аднак вядома, што 14 лютага ён выправіўся з працоўнай паездкай у Сьветлагорск.

Мюнхэнская канфэрэнцыя ў бясьпецы — штогадовая сустрэча кіраўнікоў дзяржаў, урадаў, NATO, АБСЭ і экспэртаў, якая праводзіцца ў гэтым горадзе ад 1962 году.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG