Лінкі ўнівэрсальнага доступу

Нацбанк Беларусі зьнізіў стаўку рэфінансаваньня да гістарычнага мінімуму


Ілюстрацыйнае фота

З 19 лютага 2020 году стаўка рэфінансаваньня зьніжаецца з 9 да 8,75 % гадавых, паведаміла прэс-служба Нацбанку. Гэта самы нізкі ўзровень за часы незалежнасьці Беларусі.

Стаўка рэфінансаваньня вызначае адсоткі, якія трэба выплаціць галоўнаму банку краіны за крэдыты. Ад гэтай стаўкі залежыць, наколькі дарагія ці танныя крэдыты могуць даваць банкі. Чым больш надзейная фінансавая сытуацыя ў дзяржаве, тым меншая стаўка і тым больш даступныя грошы.

Зьнізілі таксама стаўку ў крэдыце овэрнайт — з 10 да 9,75 % гадавых, стаўку па дэпазыце овэрнайт — з 8 да 7,75 % гадавых.

Адпаведныя рашэньні прыняла праўленьне Нацбанку Беларусі ў вынікц пасяджэньня аб грашова-крэдытнай палітыцы 12 лютага 2020 году, нягледзячы на тое, што інфляцыя ў студзені была высокай — 0,9%.

На папярэднім пасяджэньні праўленьня Нацбанку 6 лістапада 2019 году стаўку рэфінансаваньня зьнізілі з 9,5 да 9% гадавых, што таксама было рэкордам. Папярэдні гістарычны мінімум стаўкі рэфінансаваньня 10% гадавых дзейнічаў цягам 2006–2008 гадоў і з жніўня 2018 году да жніўня 2019-га.

Згодна з асноўнымі кірункамі грашова-крэдытнай палітыкі, стаўка рэфінансаваньня ў 2020 годзе ў сярэднім павінна скласьці 9,5% гадавых.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG