З абвінавачанымі ў карупцыйнай справе, сярод якіх кіраўнікі «Белтэлекаму», Міжбанкаўскага разьліковага цэнтру, заключылі дасудовыя пагадненьні.
Такая інфармацыя агучаная на папярэднім паседжаньні ў Вярхоўным судзе, піша БелТА.
Сьледчым упраўленьнем КДБ Беларусі завершана расьсьледаваньне крымінальнай справы па фактах атрыманьня і даваньня хабараў пры пастаўках у Беларусь тэлекамунікацыйнага абсталяваньня, кампутарнай тэхнікі і праграмнага забесьпячэньня. Усяго абвінавачваюць 16 чалавек.
Дасудовыя пагадненьні заключылі з гендырэктарам РУП «Белтэлекам» Сяргеем Сівадзедавым, старшынёй праўленьня ААТ «Беларускі міжбанкавы разьліковы цэнтар» Фэліксам Касьпяровічам, намесьнікам начальніка галоўнага ўпраўленьня інфармацыйных тэхналёгій Нацбанку Андрэем Падгорным, прадстаўніком «АМТ-Груп Інтэрнэшнл» Міхаілам Прыгарам і прадстаўніком кампаній «Смартлабс» і «УГМК-Тэлекам» грамадзянінам Расеі Ўладзімірам Казанцавым.
Касьпяровіч абвінавачваецца ў атрыманьні сумесна з Падгорным хабараў на суму 868 тысяч даляраў, Сівадзедаў узяў ня менш за 470 тысяч даляраў. Прыгара абвінавачваецца ў дачы хабараў у агульнай суме 285 тысяч даляраў, а Казанцаў — у перадачы ня менш як 190 тысяч даляраў.
У фігурантаў справы канфіскавана больш за 1,65 мільёна даляраў (у тым ліку ў аблігацыях), 62 тысячы эўра, звыш 1 кіляграма золата.
