Авіякампанія «Белавія» ў 2020 годзе запусціць рэгулярныя рэйсы зь Менску ў Вену, Ташкент і Рэўс — горад у Гішпаніі, у каталёнскай правінцыі Тарагона. Пра гэта паведаміў дырэктар Дэпартамэнту па авіяцыі Міністэрства транспарту і камунікацый Арцём Сікорскі ў інтэрвію праграме «Тыдзень» на тэлеканале СТВ.
Агенцтва БелТА цытуе Сікорскага: «У мінулым годзе маршрутная сетка авіякампаніі "Белавія" пашырылася. У гэтым годзе таксама дададуцца тры маршруты. Гэта рэгулярныя рэйсы ў Вену, Ташкент і гішпанскі Рэўс. Флёт таксама будзе пашырацца. У красавіку плянуецца пастаўка самалёта Embraer проста з заводу. Другі самалёт Embraer новага пакаленьня чакаецца да канца гэтага году. Плянуецца таксама пастаўка двух самалётаў Boeing».
