Лінкі ўнівэрсальнага доступу

«Страты на 1 рубель 48 капеек». Судзяць анархістаў за пашкоджаньне будынкаў Менгарсуду і «Валадаркі»


Мікіта Емяльянаў (з права) і Іван Комар ў жалезнай клетцы ў судзе. Менск, 6 лютага 2020 году

Анархісты Мікіта Емяльянаў і Іван Комар не прызналі сябе вінаватымі ў пашкоджаньні будынкаў Менскага гарадзкога суду і Менскага сьледчага ізалятара. Абодва з кастрычніка 2019 пад вартай. Па ранейшых зьвестках, Іван Комар на сьледзтве даваў прызнальныя паказаньні, але цяпер ад іх адмаўляецца.

6 лютага ў Савецкім раённым судзе пачаўся працэс над актывістамі анархісцкага руху Мікітам Емяльянавым і Іванам Комарам. Хлопцаў вінавацяць у цяжкіх злачынствах, за што ім паражае да 12 гадоў зьняволеньня.

Сярод іншага гэта пашкоджаньне будынкаў Менгарсуду на вуліцы Дуніна-Марцінкевіча 25 верасьня 2019 году і Менскага сьледчага ізалятара на вуліцы Валадарскага (мае статус гістарычнага помніка) 19 кастрычніка і спроба пашкодзіць той жа будынак 13 кастрычніка мінулага году. Таксама актывістаў вінавацяць у вырабе небясьпечных прыстасаваньняў («кактэйлю Молатава») і перавозцы іх па Менску. Усё гэта ў складзе групы.

Сьледчы ізалятар на вуліцы Валадарскага заявіў абвінавачаным грамадзянскі пазоў на суму 1 рубель 48 капеек — у столькі міліцыянты ацанілі страты, нанесеныя дзьвярам 2-га пад’езду ўстановы, у якія пацэліў палаючы «кактэйль Молатава». Другі «кактэйль», кінуты на тэрыторыю ўстановы 13 кастрычніка, не загарэўся і стратаў не нанёс. Гарадзкі суд вызначыў свае страты ад забруджваньня «ліхтарыкам з чырвонай фарбай» ў 143 рублі, але яны былі кампэнсаваныя падсуднымі, таму пазову суд не выстаўляў.

Савецкі раённы суд
Савецкі раённы суд

«Шыльда ёсьць, але яна ўнутры, на рэжымнай тэрыторыі»

Анархістам Комару і Емельянаву інкрымінуецца пашкоджаньне гістарычнага помніка 2-й катэгорыі — комплексу Пішчалаўскага замка, які быў пабудаваны ў 1825 годзе як турма. Тут дагэтуль трымаюць пад вартай злачынцаў і падсьледных. Таму стаіць пытаньне, ці зьяўляюцца пашкоджаныя дзьверы часткай гістарычнага помніка.

Прадстаўніца ізалятара ў судзе, старшы кантралёр установы Валерыя Нарчук, не змагла патлумачыць, ці ўваходзіць прыбудова савецкіх часоў, дзе знаходзіцца 2-і пад’езд, атакаваны анархістамі, часткай гістарычнага помніка. Паводле Валерыі Нарчук, шыльда з інфармацыяй аб тым, што будынак зьяўляецца помнікам, знаходзіцца на рэжымнай тэрыторыі, і, ня трапіўшы ўсярэдзіну «Валадаркі», яе немагчыма пабачыць.

Суд пад аховай АМАПу
Суд пад аховай АМАПу

Анархісты не выключаюць ціску на падсудных

Іван Комар, як і Мікіта Емяльянаў, не прызнаў сябе вінаватым і адмовіўся да допыту сьведак даваць паказаньні. Паводле актывіста анархісцкага руху Вячаслава Касінерава, раней анархісты ведалі, што ў справе ёсьць яўка з павіннай Івана Комара і ягоныя прызнальныя паказаньні.

Вячаслаў Касінераў
Вячаслаў Касінераў

«Ці праўда гэта і што спрычынілася да такіх паказаньняў Івана, калі яны сапраўды былі, мы дакладна ня ведаем, але не выключаем ціску. Справа відавочна палітычная, хлопцаў затрымалі за правядзеньне акцый салідарнасьці з нашым аднадумцам Зьмітром Паліенкам. У выпадку з будынкам суду гэта адбылося напярэдадні працэсу, у другім — калі Паліенка сядзеў на „Валадарцы“ і за яго ўсе заступаліся. Таму мы будзем дамагацца, каб у выпадку прызнаньня вінаватымі іх палічылі палітвязьнямі», — сказаў Вячаслаў Касінераў.

Вакол Савецкага суду і ўнутры будынку сёньня прынятыя надзвычайныя захады бясьпекі: дзяжураць амапаўцы, наведнікаў правяраюць праз мэталадэтэктар, поўна міліцыянтаў у цывільным. Аднак тых, хто падтрымлівае падсудных, на працэс пусьцілі.

Па абедзе ў судзе пачнецца допыт сьведак.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG