Лінкі ўнівэрсальнага доступу

Мінздароўя не зарэгістравала выпадкі заражэньня каранавірусам у Беларусі


Маска дапамагае засьцерагчыся ад каранавірусу. Фота з Ганкогу.

З такой заявай выступіў міністар аховы здароўя Беларусі Ўладзімер Каранік, якога цытуе БЕЛТА.

«Мы ацэньваем патэнцыйныя рызыкі і распрацоўваем комплекс мерапрыемстваў, які дазволіць гэтыя рызыкі мінімізаваць», – сказаў Каранік.

Колькасьць сьмерцяў з прычыны заражэньня новым каранавірусам у Кітаі ўзрасла да 106, на 27 студзеня ўлады афіцыйна пацьвердзілі 4515 выпадкаў захворваньня, паведаміў 28 студзеня дзяржаўны камітэт КНР у пытаньнях аховы здароўя.

27 студзеня зарэгістравалі 1771 новых выпадкаў захворваньня (зь іх 516 — цяжкія) і 26 новых сьмерцяў (24 — у правінцыі Хубэй, па 1 — у Пэкіне і Хайнані).

Два беларусы папрасіліся дадому

Тым часам намесьнік начальніка ўпраўленьня Азіі і Афрыкі Міністэрства замежных спраў Беларусі Ігар Белы расказаў журналістам, што два беларусы папрасілі дапамагчы ім зьехаць з кітайскай правінцыі Хубэй.

Як удакладніў дыплямат, агулам там знаходзяцца дзевяць грамадзян Беларусі, зь пяцьцю наладжаны тэлефонны кантакт. Два выказалі жаданьне пакінуць рэгіён.

Ігар Белы сказаў, што немагчыма агучыць дакладную колькасьць беларусаў, якія знаходзяцца ў Кітаі: яны прыязджаюць у краіну з рознымі мэтамі, як індывідуальна, так і ў арганізаваных турах.

Што трэба ведаць пра новы каранавірус з Кітаю

  • Невядомы вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease). Вірус спачатку меў назву 2019-nCov, цяпер афіцыйна завецца SARS-CoV-2.
  • Па стане на раніцу 28 лютага, ад новага вірусу па ўсім сьвеце памерлі ўжо 2858 чалавек, афіцыйна пацьвердзілі больш за 83,4 тысячы выпадкаў заражэньня вірусам (абсалютная большасьць выпадкаў хваробы і сьмерцяў ад яе фіксуюць у Кітаі). За распаўсюдам вірусу можна сачыць тут (дадзеныя абнаўляюцца штодзённа).

  • 27 лютага ў Беларусі зафіксавалі першы выпадак COVID-19 — вірус выявілі ў студэнта аднаго зь беларускіх ВНУ, грамадзяніна Ірану, які прыбыў з Баку 22 лютага.
  • Сусьветная арганізацыя аховы здароўя рэкамэндуе трымацца далей ад людзей, якія чхаюць і кашляюць, і ня есьці дрэнна апрацаванае (недасмажанае або недаваранае) мяса. Паводле адной з вэрсій, вірус мог перадацца людзям пасьля ўжываньня якога-небудзь зь мясных або морапрадуктаў з рынку ва Ўхані.​
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Аляксандар Лукашэнка казаў, што беларусам наконт каранавірусу хвалявацца ня варта: «Мыйце рукі, менш абдымайцеся зь незнаёмымі людзьмі на вуліцы, усё астатняе — за Міністэрствам здароўя». Беларускія мэдыкі ж давалі больш дэталёвыя рэкамэндацыі.
  • У сувязі з распаўсюдам каранавірусу ў аэрапортах Беларусі, а таксама іншых краінаў узмацнілі захады бясьпекі: з дапамогай спэцыяльных рамак і іншых прыбораў вымяраюць тэмпэратуру людзей, якія ляцяць з Кітаю і іншых краінаў «групы рызыкі». Вядзецца санітарны кантроль на ўсіх памежных пунктах пропуску ў Беларусь.
  • Міністэрства аховы здароўя, а таксама міністэрства спорту і турызму параілі беларусам ня езьдзіць у Кітай.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя на многія іншыя рэсьпіратарныя захворваньні, неабходны дадатковы скрынінг.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG