Прэзыдэнт Эўрапейскай камісіі Урсула фон дэр Ляен і кіраўнік Эўрапейскай Рады Шарль Мішэль у пятніцу, 24 студзеня, падпісалі дамову аб выхадзе Вялікабрытаніі з Эўрапейскага Зьвяза.
Пра гэта гаворыцца ў твітэры палітыкаў.
«Усе непазьбежна зьменіцца, але нашае сяброўства застанецца. Мы пачынаем новы разьдзел як партнэры і саюзьнікі», — напісаў кіраўнік Эўрапейскай Рады. Ён таксама дадаў на францускай мове, што зь нецярпеньнем чакае магчымасьці напісаць гэтую новую старонку.
Парлямэнт Вялікабрытаніі зацьвердзіў дамову аб выхадзе з ЭЗ у сераду, 22 студзеня. На наступным тыдні яе павінен ратыфікаваць Эўрапейскі парлямэнт.
Вялікабрытанія выйдзе з Эўрапейскага Зьвязу 31 студзеня.
