Лінкі ўнівэрсальнага доступу

У Беларусі атрымалі рэактывы для выяўленьня кітайскага каранавірусу,— міністар здароўя


Ілюстрацыйная выява

Міністар аховы здароўя Беларусі Ўладзімер Каранік паведаміў БелТА, што беларускія мэдыкі атрымалі «ўсе рэактывы», якія дазваляюць выявіць менавіта новы штам каранавірусу 2019-nCoV, выяўленага ў Кітаі.

Дзеля прафіляктыкі новага захворваньня, запэўнівае міністар, прынятыя ўсе неабходныя захады. У менскім аэрапорце празь цеплавізар выяўляюць людзей з высокай тэмпэратурай, дзяжурыць санстанцыя.

Міністар пацьвердзіў, што ў дзяўчыны, якая нядаўна прыехала з Кітаю і была шпіталізаваная ў Менску з падазрэньнем на кітайскі каранавірус, дыягнаставалі звычайны грып сярэдняй цяжкасьці.

Каранік сьцьвярджае, што адносна яе «былі прынятыя ўсе проціэпідэміялягічныя захады». Сама хворая расказала, што ёй давялося працяглы час чакаць, пакуль яе пакладуць у палату, і дамагацца, каб з падазрэньнем на новы вірус яе паклалі не ў агульную, а ў асобную палату. У лякарню яе забралі ў 17 гадзінаў вечара, да канца дня толькі зрабілі ўкол ад тэмпэратуры і ўкол глюкозы, а кроў на аналіз узялі толькі зранку.

Хоць сродкі дыягностыкі новага вірусу ўжо распрацаваныя, але да стварэньня вакцыны можа прайсьці яшчэ ня менш за 6 месяцаў, адзначалі раней расейскія мэдыкі. Сусьветная арганізацыя здароўя цяпер разглядае рашэньне аб абвяшчэньні надзвычайнай сытуацыі ў сувязі з распаўсюдам вірусу.

Што трэба ведаць пра новы каранавірус з Кітаю

  • Невядомы вірус выявілі ў кітайскім горадзе Ўхань у сьнежні 2019 году. Спачатку паведамлялі, што ва Ўхані была зарэгістраваная ўспышка пнэўманіі, аднак мэдыкі высьветлілі, што прычынай хваробы стаў раней невядомы від каранавірусу.
  • Афіцыйнай назвай новага каранавірусу з Кітаю стала COVID19 (Corona Virus Disease).

  • 11 студзеня ў Кітаі зафіксавалі першую сьмерць ад хваробы. Кітайскія ўлады прызналі, што вірус можа перадавацца ад чалавека да чалавека, прычым нават падчас інкубацыйнага пэрыяду.
  • Выпадкі заражэньня каранавірусам па-за межамі Кітаю зафіксавалі ў 27 краінах.
  • Улады Кітаю закрылі ўезд і выезд з 10 гарадоў.
  • Па стане на раніцу 14 лютага, ад новага вірусу па ўсім сьвеце памерлі ўжо 1383 чалавек, афіцыйна пацьвердзілі больш за 64,4 тысячы выпадкаў заражэньня вірусам. За распаўсюдам вірусу можна сачыць тут (дадзеныя абнаўляюцца штодзённа).
  • Сусьветная арганізацыя аховы здароўя рэкамэндуе трымацца далей ад людзей, якія чхаюць і кашляюць, і ня есьці дрэнна апрацаванае (недасмажанае або недаваранае) мяса. Паводле адной з вэрсій, вірус мог перадацца людзям пасьля ўжываньня якога-небудзь зь мясных або морапрадуктаў з рынку ва Ўхані.​
  • Распаўсюджваньне вірусу з Ухані параўноўваюць з другой успышкай каранавірусу ў Кітаі — SARS-CoV або атыповай пнэўманіі — у 2002-2003 гадах. Тады памерлі каля 800 хворых.
  • Улады Кітаю 24 студзеня заявілі, што самая першая пацыентка з новым каранавірусам выздаравела і выпісаная зь лякарні. 56-гадовая жанчына адчула сябе блага 10 студзеня, была шпіталізаваная 15-га.
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Аляксандар Лукашэнка казаў, што беларусам наконт каранавірусу хвалявацца ня варта: «Мыйце рукі, менш абдымайцеся зь незнаёмымі людзьмі на вуліцы, усё астатняе — за Міністэрствам здароўя». Беларускія мэдыкі ж давалі больш дэталёвыя рэкамэндацыі.
  • У сувязі з распаўсюдам каранавірусу ў аэрапортах Беларусі, а таксама іншых краінаў узмацнілі захады бясьпекі: з дапамогай спэцыяльных рамак і іншых прыбораў вымяраюць тэмпэратуру людзей, якія ляцяць з Кітаю і іншых краінаў «групы рызыкі».
  • Вядзецца санітарны кантроль на ўсіх памежных пунктах пропуску ў Беларусь, у тым ліку з дапамогай цеплавізійнага абсталяваньня. Лябараторныя сродкі для выяўленьня 2019-nCoV ужо даставілі ў краіну.
  • Міністэрства аховы здароўя, а таксама міністэрства спорту і турызму параілі беларусам ня езьдзіць у Кітай.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя на многія іншыя рэсьпіратарныя захворваньні, неабходны дадатковы скрынінг.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG