Лінкі ўнівэрсальнага доступу

Асуджанаму на пажыцьцёвае забойцу міліцыянта далі яшчэ 23 гады зьняволеньня


Сяргей Дзёўкш у судзе

Менскі гарадзкі суд 13 студзеня асудзіў на 23 гады зьняволеньня 45-гадовага Сяргея Дзёўкша, прызнаўшы яго вінаватым у замаху на забойства міліцыянта Ўладзімера Баслыка ў 2001 годзе.

Па сукупнасьці ранейшых злачынстваў Дзёўкш, які ўжо адбывае пакараньне, асуджаны да пажыцьцёвага зьняволеньня ў калёніі ва ўмовах асобага рэжыму.

Усё адбылося ў 2001 годзе, калі на вуліцы нарад міліцыі паспрабаваў праверыць дакумэнты ў падазронага мінака, а той пачаў страляць з дробнакалібэрнага пісталета ды параніў міліцыянта, а сам уцёк.

Праз столькі гадоў знайшліся сьведкі, якія сьцьвярджалі ў судзе, што страляў менавіта Сяргей Дзёўкш. Сам ён віны не прызнаў. Пацярпелы Ўладзімер Баслык ня змог упэўнена апазнаць нападніка.

Суд пастанавіў, што замах на жыцьцё міліцыянта ўчыніў Сяргей Дзёўкш, і прысудзіў 23 гады. Пры гэтым Дзёўкш ужо адбывае пажыцьцёвае зьняволеньне.

У 2001-м Дзёўкш забіў міліцыянта

Для Сяргея Дзёўкша гэта ня першы суд. У 1990-х менчука судзілі за крадзяжы, а ў 2004 годзе ён атрымаў пажыцьцёвае зьняволеньне за забойства міліцыянта Ігара Кашкана, якое адбылося ў 2001 годзе. Зброю супраць міліцыянта забойца ўжыў на кватэры знаёмай, у якой хаваўся ад вышуку. Пасьля забойства злачынец здолеў уцячы за мяжу. У 2003 годзе Дзёўкша затрымалі ў Варшаве і ўрэшце выдалі ў Беларусь з умовай, што да яго ня будзе ўжыта сьмяротнае пакараньне.

Сяргей Дзёўкш дагэтуль не прызнае сябе вінаватым і ў забойстве міліцыянта Ігара Кашкана ды працягвае аспрэчваць той прысуд. У тым ліку асуджаны беларус абскардзіў у ААН ягонае затрыманьне ў Варшаве, але пакуль безвынікова.

Прысуд пакуль не набыў моц і можа быць абскарджаны ў Вярхоўным судзе. На абскарджаньне прысуду Менскага гарадзкога суду Сяргей Дзёўкш мае 10 дзён. Пасьля набыцьця сілы прысуд будзе азначаць немагчымасьць выйсьці на волю.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG