Спадарожнік для вывучэньня транзытных экзаплянэт (TESS) знайшоў першую плянэту памерам з Зямлю ў зоне, прыдатнай для жыцьця, паведамляе касьмічнае агенцтва NASA.
Плянэта TOI 700 d разьмешчана на адлегласьці крыху больш за 100 сьветлавых гадоў ад Зямлі ў паўднёвым сузор’і Дорада. Яна прыкладна на 20% большая за нашую плянэту і круціцца вакол чырвонага карліка TOI 700 — невялікай і адносна халоднай зоркі — за 37 дзён.
Экзаплянэта атрымлівае ад сваёй зоркі 86% энэргіі, якую ад Сонца атрымлівае Зямля.
Адкрыцьцё экзаплянэты, якая верціцца вакол зоркі сонечнага тыпу, стала адным з дасягненьняў навукі, за якія Нобэлеўскі камітэт прысудзіў прэмію па фізыцы ў 2019 годзе. Яе атрымалі навукоўцы Мішэль Маёр і Дыдзье Кело.
