Суд Пакістану завочна асудзіў былога прэзыдэнта краіны Пэрвэза Мушарафа на сьмяротнае пакараньне па справе аб дзяржаўнай здрадзе. Справа знаходзілася на разглядзе з 2013 году.
Былога пакістанскага лідэра прызналі вінаватым ва ўвядзеньні ў краіне надзвычайнага становішча падчас беспарадкаў у 2007 годзе і прыпыненьні дзеяньня канстытуцыі. Сам палітык не прысутнічаў на абвяшчэньні прысуду. Ён мае права падаць апэляцыю.
Гэта першы ў гісторыі краіны выпадак, калі сьмяротны прысуд быў вынесены кіраўніку дзяржавы. Мушараф віны не прызнае і называе абвінавачаньні палітычна матываванымі.
Генэрал Пэрвэз Мушараф прыйшоў да ўлады ў выніку вайсковага перавароту ў 1999 годзе. У 2001 годзе ён стаў прэзыдэнтам Пакістану. У 2008 — сышоў у адстаўку і жыў у Аб’яднаных Арабскіх Эміратах і Вялікабрытаніі.
У пачатку 2013 году Мушараф вярнуўся ў Пакістан. Неўзабаве яго арыштавалі і абвінавацілі ў забойстве экс-прэм’ера Бэназір Бгута і дзяржаўнай здрадзе. У 2016 годзе яму дазволілі пакінуць краіну з увагі на стан здароўя.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў