Суд у сталіцы Судана Хартуме прысудзіў былому прэзыдэнту краіны два гады турмы па абвінавачваньні ў карупцыі, паведамляе канал «Аль-Джазіра».
75-гадовы Амар аль-Башыр прызнаны вінаватым у незаконным захоўваньні замежнай валюты, атрыманьні грошай з-за мяжы і адмываньні незаконных даходаў. З прычыны ўзросту ён будзе адбываць пакараньне ў карэкцыйным цэнтры.
Аль-Башыр быў скінуты вайскоўцамі ў красавіку пасьля шматмесячных масавых пратэстаў. Яны пачаліся пад эканамічнымі лёзунгамі, але перарасьлі ў дэманстрацыі з патрабаваньнем адстаўкі прэзыдэнта. У Судане супраць былога дыктатара адкрыты яшчэ дзьве крымінальныя справы. У траўні яму было прад’яўленае абвінавачваньне ў падбухторваньні і датычнасьці да забойства пратэстоўцаў, а на гэтым тыдні ён быў выкліканы для допыту з нагоды яго ролі ў вайсковым перавароце 1989 года, які прывёў яго да ўлады, паведамляе Reuters.
Акрамя таго, супраць яго дзейнічаюць два ордэры на арышт Міжнародным крымінальным судом. Там яму прадʼяўленыя абвінавачваньні ў генацыдзе, злачынствах супраць чалавецтва і ваенных злачынствах, учыненых падчас ваеннага канфлікту ў правінцыі Судана Дарфуры.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў