Уладальнікі невялікіх фірмаў і індывідуальня прадпрымальнікі, якія займаюцца міжнароднымі аўтамабільнымі грузаперавозкамі, заяўляюць, што іх фактычна пазбавілі працы. У адказ пагражаюць мітынгам або страйкам.
Як вынікае з расьследаваньня Auto.tut.by, Міністэрства транспарту і камунікацыі абмежавала колькасьць «дазволаў» на праезд па тэрыторыі замежнай дзяржавы. Праблема, паводле некаторых зьвестак, закранула каля паўтысячы дробных фірмаў-перавозчыкаў.
Пацярпелі пераважна дробныя перавозчыкі, у якіх па 2-3 грузавікі. Амаль усе езьдзяць у Польшчу, для чаго патрэбны двухбаковыя дазволы. Аднак сёлета галіновае міністэрства ўвяло новую сыстэму разьмеркаваньня.
Згодна з раней адпрацаваным мэханізмам, транспартныя ведамствы розных краін дамаўляюцца і абменьваюцца паміж сабой пэўнай колькасьцю «дазволаў», а потым ужо кожная разьмяркоўвае іх паміж сваімі перавозчыкамі. Блянкі паўторна выкарыстоўваць нельга, парушэньне цягне штраф у некалькі тысяч эўра.
Перавозчыкі лічаць, што беларускія ўлады падтрымліваюць толькі буйныя кампаніі і пазбаўляюцца ад маленькіх. Абдзеленыя дальнабойнікі стварылі групу ў сацсетках (ужо больш за 700 удзельнікаў), а таксама пэтыцыю-прэтэнзію на імя міністра транспарту і камунікацыі.
У звароце да беларускіх уладаў выкладаецца сутнасьць праблемы і агучваецца патрабаваньне зьняць квоты на выдачу дазволаў.
Зрэшты, ёсьць у перавозчыкаў і больш радыкальныя ідэі: напрыклад, арганізаваць мітынг на грузавіках або страйк на фурах проста на дарозе ці нават перакрыць трасу каля мяжы.
У Міністэрстве транспарту і камунікацыі «вывучаюць пытаньне», але ўцямных камэнтароў адтуль пакуль што няма.
