Эўрапарлямэнт абвясьціў надзвычайную кліматычную і экалягічную сытуацыю. За адпаведную рэзалюцыю сёньня, 28 лістапада, прагаласавалі дэпутаты. Дакумэнт ня носіць абавязковага характару.
Дэпутаты рэкамэндавалі Эўракамісіі прасачыць, каб усе заканадаўчыя і бюджэтныя рашэньні адпавядалі мэце Парыскага пагадненьня — не дапусьціць глябальнага пацяпленьня больш чым на паўтара градуса паводле Цэльсію.
Эўрапарлямэнт таксама заклікаў ААН на канфэрэнцыі па клімаце ў Мадрыдзе ў сьнежні ўзяць абавязаньне скараціць выкіды парніковых газаў на 55 працэнтаў да 2030 году. Дэпутаты ў рэзалюцыі папрасілі Эўракамісію ўключыць мараходзтва ў агульную сыстэму абмену квотамі газавай эмісіі.
Дэпутаты адзначылі, што краіны Эўразьвязу з 2020 году павінны падвоіць свае ўнёскі ў міжнародны Зялёны кліматычны фонд і спыніць субсыдыі на выкапнёвае паліва.
Паводле дадзеных Сусьветнай мэтэаралягічнай арганізацыі, у 2018 годзе канцэнтрацыя вуглякіслага газу перавысіла на 47 адсоткаў ўзровень даіндустрыяльнай эпохі (раньняя стадыя разьвіцьця грамадзтва да сярэдзіны XVIII стагодзьдзя).
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў