У Дрэздэне абрабаваны музэй старадаўніх ювэлірных вырабаў «Зялёнае сховішча» (Grünes Gewölbe). Паводле газэты Bild, зламысьнікі праніклі ў Дрэздэнскі замак, дзе разьмешчаны музэй, самым ранкам у панядзелак, папярэдне падпаліўшы электрашчыт і, такім чынам, адключыўшы электрычнасьць. Рабаўнікі вынесьлі ювэлірныя вырабы, пакінуўшы буйнейшыя экспанаты на месцы.
Шкода папярэдне ацэньваецца прыкладна на мільярд эўра.
Прэм’ер-міністар нямецкай фэдэральнай зямлі Саксонія Міхаэль Крэчмэр напісаў у твітэры, што без каштоўнасьцяў, якія захоўваліся ў музэі, немагчыма ўявіць сабе саксонскую гісторыю. Паліцыя вядзе пошук выкрадальнікаў.
Калекцыя была заснавана ў XVIII стагодзьдзі саксонскім курфюрстам Аўгустам Моцным. Калекцыя ацалела падчас Другой сусьветнай вайны — яе вывезьлі ў Маскву як ваенны трафэй, але ў 1958 годзе вярнулі ў Дрэздэн. Агенцтвы паведамляюць, што яе найбольш каштоўны экспанат — «Дрэздэнскі зялёны брыльянт» на 41 карат — ня быў выкрадзены, бо ён знаходзіцца цяпер на выставе ў нью-ёрскім музэі Мэтраполітэн.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў