Лінкі ўнівэрсальнага доступу

У Швэцыі спынілі справу супраць стваральніка Wikileaks Джуліяна Асанжа


Джуліян Асанж

У Швэцыі пракуратура абвясьціла аб тым, што спыняе расьсьледаваньне абвінавачваньняў у згвалтаваньні, вылучаных у дачыненьні да заснавальніка Wikileaks Джуліяна Асанжа.

Па словах прадстаўніка пракуратуры, доказы віны Асанжа, сабраныя ў ходзе сьледзтва, недастатковыя для таго, каб перадаць справу ў суд.

Рашэньне аб спыненьні расьсьледаваньня можа быць абскарджана.

Абвінавачваньні супраць Асанжа былі вылучаныя ў 2010 годзе. Сам ён адмаўляў іх, сьцьвярджаючы, што жанчына, якая яго абвінаваціла, займалася з ім сэксам добраахвотна.

Швэцыя тады запатрабавала ад Вялікабрытаніі экстрадыцыі Асанжа. Баючыся экстрадыцыі, заснавальнік Wikileaks схаваўся ў пасольстве Эквадора ў Лёндане. Улады Эквадора далі яму палітычны прытулак. Асанж амаль 7 гадоў жыў у будынку амбасады, а ўвесну гэтага года быў выдадзены брытанскім уладам пасьля таго, як быў пазбаўлены прытулку. Цяпер ён адбывае турэмны тэрмін за парушэньне ўмоў закладу, а таксама чакае рашэньня суда аб яго экстрадыцыі ў ЗША.

Злучаныя Штаты патрабуюць экстрадаваць Асанжа па цэлым шэрагу абвінавачваньняў, зьвязаных з незаконным атрыманьнем і публікацыяй сакрэтных дакумэнтаў Пэнтагона. Яму пагражае працяглы турэмны тэрмін.

Імя заснавальніка Wikileaks згадвалася таксама ў сувязі з публікацыяй дакумэнтаў са ўзламанага сэрвэра Дэмакратычнай партыі ЗША, у выкраданьні якіх спэцпрокурор Робэрт Мюлер абвінаваціў супрацоўнікаў расейскай ваеннай выведкі.

У канцы траўня прадстаўнік ААН па супрацьдзеяньні катаваньняў Нільс Мэльцэр заявіў, што Асанж у турме пакутуе ад псыхалягічных катаваньняў. На думку Мэльцэра, у заснавальніка Wikileaks прыкметная ноткі трывогі і адчуваньне пагрозы з боку ўсіх навакольных яго людзей.

Пасьля таго як Асанжа пазбавілі прытулку ў Эквадоры, у Швэцыі аднавілі расьсьледаваньне па справе аб згвалтаваньні, аднак швэдзкі суд ня стаў запытваць Вялікабрытанію аб экстрадыцыі заснавальніка Wikileaks.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG